00:00:00 IGIHE NETWORK KN KINYARWANDA EN ENGLISH FR FRANCAIS

Mexique: Operasiyo yo guta muri yombi umuhungu wa ‘El Chapo’ yaguyemo abantu 29

Yanditswe na Jean Paul Rutagengwa
Kuya 7 Mutarama 2023 saa 07:18
Yasuwe :

Abantu 29 barimo abasirikare 10 ba Mexique baguye mu gikorwa cya gisirikare cyo guta muri yombi umuhungu wa kabuhariwe mu gucuruza ibiyobyabwenge ‘El Chapo’.

Ovidio Guzman uzwi nka ‘El Raton’ cyangwa ‘The Mouse’, yafashwe kuwa Kane ukuwe mu majyaruguru ya Leta ya Sinaloa ajyanwa mu Mujyi wa Mexico mu ndege ya gisirikare.

Akimara gutabwa muri yombi agatsiko k’abagizi ba nabi kazwi nka Sinaloa Carter kahoze kayobowe na se w’uyu muhungu gafatanyije n’ibindi byihebe barwanyije inzego zishinzwe umutekano, batwika imodoka ndetse banafunga imihanda izengurutse Leta ya Pacific Coastal.

Minisitiri w’Ingabo wa Mexique, Louis Cresencio Sandoval yavuze ko iyi mirwano yaguyemo abasirikare b’iki gihugu 10.

Ati ”Abasirikare bacu 10 baburiye ubuzima muri iyi mirwano ndetse n’abandi 35 bakomerejwe n’amasasu”.

Uyu musore ashinjwa gukomeza ibikorwa bya se, EL chapo ufungiwe muri Leta Zunze Ubumwe za Amerika, aho yari umucuruzi w’ibiyobyabwenge mpuzamahanga ndetse anayoboye agatsiko k’abagizi ba nabi ka Sinaloa Carter.

Igikorwa cyo guta muri yombi Ovidio Guzman w’imyaka 32 y’amavuko kibaye nyuma y’amezi atandatu ari gushakishwa nk’uko byatangajwe na Guverinoma ya Mexique. Kuri ubu yamaze kugezwa muri gereza ya Altiplano iherereye i Mexico.

Leta Zunze Ubumwe za Amerika zari zarashyizeho miliyoni $5 ku muntu ushobora gutanga amakuru ashobora gutuma Ovidio Guzman atabwa muri yombi.

Operasiyo yo guta muri yombi umuhungu wa ‘El Chapo’ yakozwe n'igisirikare cya Mexique
Ovidio Guzman yatawe muri yombi ashinjwa gukomeza gahunda ya se yo gucuruza ibiyobyabwenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .