00:00:00 IGIHE NETWORK KN KINYARWANDA EN ENGLISH FR FRANCAIS

Maroc irashinjwa kwinjira muri telefone ya Perezida Macron

Yanditswe na Muhonzire Sylvine
Kuya 21 Nyakanga 2021 saa 10:55
Yasuwe :
0 0

Inzego z’ubutasi za Maroc zirashinjwa kwinjira muri telefone ya Perezida w’u Bufaransa, Emmanuel Macron, zifashishije ikoranabuhanga rya Pegasus, rya sosiyete y’Abanya-Israel ya NSO iherutse gushyirwa mu majwi ko ineka abantu ikoresheje iri koranabuhanga ryinjizwa muri telefone rwihishwa.

Ku Cyumweru tariki 19 Nyakanga 2021 nibwo ibinyamakuru 17 byatangaje raporo ku iperereza ryakozwe kuri NSO, riyobowe n’umuryango utegamiye kuri leta ukorera mu Bufaransa wa Forbidden Stories ndetse n’uharanira uburenganzira bwa muntu Amnesty International.

Iyi raporo yerekanye urutonde rw’ibihugu icumi ku Isi bikoresha iri koranabuhanga rya Pegasus mu kuneka abantu birimo Maroc n’u Rwanda muri Afurika ndetse inerekana urutonde rw’abagera ku 50.000 binjiriwe kuva mu 2016 kugeza 2021 barimo na Perezida Macron.

Umuyobozi wa Forbidden Stories, Laurent Richard, yatangaje ko inzego z’ubutasi za Maroc ari zo zinjiye muri telefone ya Perezida Macron, zinjirira abayobozi bakuru 14 bo muri Guverinoma y’u Bufaransa harimo n’uwahoze ari Minisitiri w’Intebe w’iki gihugu, Édouard Philippe mu 2019.

Yagize ati “Twasanzemo nimero za telefone zabo, ariko ntabwo twigeze tubasha gukora iperereza ryimbitse kuri telefone ya Emmanuel Macron ngo turebe niba koko iri koranabuhanga rya Pegasus ryakoreshejwe muri telefone ye, gusa ibi ntibivuze ko atanetswe.”

Perezidansi y’u Bufaransa yavuze ko nibiramuka bigaragaye ko koko iki gihugu cyumvirije telefone ya Macron, bizaba bibi cyane.

Ku wa Mbere tariki 19 Nyakanga,Maroc yahakanye yivuye inyuma ko idakoresha iri koranabuhanga rya Pegasus.

Uretse Perezida Macron, Radio France yatangaje ko inzego z’ubutasi za Maroc zanetse Umwami w’iki gihugu, Mohammed VI hamwe n’abandi bo mu muryango w’ibwami barimo umwamikazi, Lalla Salma Bennani, mubyara we Prince Moulay Hicham Alaoui n’abandi.

The Washington Post yo mu Bwongereza yo yatangaje ko hari abandi bakuru b’ibihugu binjiriwe muri telefone, barimo Perezida wa Afurika y’Epfo, Cyril Ramaphosa, Perezida wa Iraq, Baram Salih, Minisitiri w’Intebe wa Pakistan, Misiri na Maroc.

Ku rutonde rw’abanetswe hariho abanyapolitiki n’abayobozi bakuru bagera kuri 600 bo mu bihugu 34.

Iri koranabuhanga rya Pegasus ryakozwe na Sosiyete ya NSO, iyo ryinjijwe muri telefone y’umuntu ribika ubutumwa yakira n’ubwo yohereza atabizi, rikabika amafoto ye ndetse rikanafata amajwi igihe avugira kuri telefone.

Rifite kandi ubushobozi bwo kujya muri camera ya telefone rwihishwa cyangwa rigafungura ahafata amajwi nyirayo atabizi rikabika ibiganiro agirana n’abantu n’iyo yaba atari gukoresha telefone mbese mu gihe ayifite aba ameze nk’uri kwifata amajwi.

Iri koranabuhanga rishobora kwerekana aho uri, aho wahoze n’abo mwahuye na bo bose. Rishobora kujya mu bwoko bwa telefone bwose yaba telefone zikoresha Android cyangwa iOS [ikoreshwa muri iPhone].

Inzego z’ubutasi za Maroc zirashinjwa kwinjira muri telefone ya Perezida w’u Bufaransa, Emmanuel Macron, zifashishije ikoranabuhanga rya Pegasus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .