00:00:00 IGIHE NETWORK KN KINYARWANDA EN ENGLISH FR FRANCAIS

M23 yafashe igice cya Kisharo nyuma yo kuhirukana FDLR

Yanditswe na Igizeneza Jean Désiré
Kuya 3 Mutarama 2023 saa 08:47
Yasuwe :

Umutwe wa M23 wafashe agace ka Kisharo, umujyi ufatwa nk’umurwa mukuru wa Binza muri teritwari ya Rutshuru ho mu Ntara ya Kivu y’Amajyaruguru nyuma yo guhangana bikomeye n’abarwanyi ba FDLR.

M23 yafashe Kisharo kuri uyu wa 02 Mutarama 2023 ibice byiyongera kuri Rumangabo yafashe mu mpera z’Ukwakira 2022, igice kibamo ikigo cya gisirikare cy’ingabo za Leta mu gihe Kishishe yafashwe mu mpera z’Ugushyingo.

Abaturiye Kisharo bavuga ko batangiye kumva urusaku rw’amasasu y’imbunda zikomeye n’izoroheje guhera saa moya yo muri RDC ibyatumye abaturage batagira guhunga nk’uko Radio Okapi yabitangaje.

Abaturage bahise bahungira mu bice bya Buramba ni ukuvuga mu birometero 30 uvuye Kisharo abandi bahungira mu bice bya Nyamilima na Ishasha biherereye mu birometero 150 uvuye mu majyaruguru y’Umujyi wa Goma.

M23 yarwanye ishaka gufata Kisharo aho ibicuruzwa ndetse n’indi mitungo yimukanwa y’abaturage yari yasahuwe kuri uyu wa Mbere yari iherereye.

Ku rundi ruhande ariko ingabo za Congo kuri iki Cyumweru zari zatsimbuye abarwanyi ba M23 mu bice bya Kamatembe na Karenga ho muri Pariki ya Virunga muri teritwari ya Masisi mu mirwano yabahuje yatangiye ku wa 31 Ukuboza 2022.

M23 yafashe Kisharo mu gihe yatangaje ko yemerereye ingabo z’Umuryango wa Afurika y’’Iburasirazuba zoherejwe kugarura amahoro mu Burasirazuba bwa Congo, kuva mu duce twa Kishishe na Rumangabo wari wafashe, mu rwego rwo kubahiriza ibyemezo byafashwe n’abakuru b’ibihugu byo mu karere.

M23 yijejwe ko izoroherezwa kuganira na Leta ya Congo, mu gihe izaba yubahirije ibiteganywa n’amasezerano ya Luanda.

M23 yafashe igice cya Kisharo nyuma y'imirwano yayihuje na FDLR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .