00:00:00 IGIHE NETWORK KN KINYARWANDA EN ENGLISH FR FRANCAIS

Loni yongeye gusaba Aba-Taliban koroshya ingamba zikakaye zafatiwe abagore

Yanditswe na Igizeneza Jean Désiré
Kuya 14 Mutarama 2023 saa 03:59
Yasuwe :

Bijyanye n’uko abakozi b’abakobwa bakora mu bikorwa by’ubutabazi mu miryango iharanira uburenganzira bwa muntu muri Afghanistan bakomeje kuba bake, Akanama k’Umuryango w’Abibumbye gashinzwe umutekano ku Isi kasabye iki gihugu koroshya amategeko abuza abagore n’abakobwa kujya mu mirimo itandukanye.

Leta ya Afghanistan iyobowe kuri ubu n’Aba-Taliban iherutse gushyiraho amabwiriza abuza abagore n’abakobwa kujya gukora mu miryango mpuzamahanga ikorera mu gihugu cyane ko ngo batubahiriza amategeko ya Sharia arimo kwikwiza mu maso hose.

Kuri uyu wa 13 Mutarama 2023 Ambasaderi w’u Buyapani mu Muryango w’Abibumbye wavugiye abagize aka kanama, Ishikane Kimihiro, yavuze ko asaba “Aba-Taliban gukuraho byihuse ingamba zafatiwe abagore n’abakobwa”.

Yasabye ko Aba-Taliban “bagomba kubaha uburenganzira bw’abagore n’abakobwa ndetse ko bagomba gufatwa kimwe n’abandi bakemererwa kugira uruhare mu nzego zitandukanye zirimo uburezi, politiki, ubukungu no kwisanzura mu ruhame nk’abandi.”

Ambasaderi wa Leta zunze Ubumwe z’Abarabu mu Muryango w’Abibumbye, Lana Nusseibeh we yavuze ko ibi bibazo bigomba kwitabwaho kuko ibikorwa by’ubutabazi ari ingenzi muri Afghanistan, bityo ko aka kanama gakwiye gukorana n’Aba-Taliban mu kugerageza koroshya izi ngamba zafatiwe abagore.

Kugeza ubu imwe mu miryango mpuzamahanga yita ku buburenganzira bwa muntu n’ikora ibikorwa by’ubutabazi muri iki gihugu yamaze kugaragaza ko itazigera yongera gufungura imiryango mu gihe abagore n’abakobwa bataremererwa gukora.

Iyi irimo nk’Umuryango wo muri Norvège wita ku mpunzi, (Norwegian Refugee Council) Care, World Vision, Islamic Relief n’iyindi ku buryo itagikora kuva mu Ukuboza umwaka ushize, icyakora iya Loni yo ivuga ko izakomeza gukora.

Umuyobozi wa Norwegian Refugee Council, Jan Egeland yabwiye DW ko yavuganye n’abayobozi b’aba-Taliban barimo abaminisitiri n’abo mu madini atandukanye yemeza ko na bo bemeye ko izi ngamba zafatiwe abagore zidakwiriye, ibitanga icyizere ko wenda zishobora koroshywa.

Kuva Aba-Taliban bajya ku butegetsi bijeje ko bazubahiriza uburenganzira bwa muntu n’ubw’abagore n’abakobwa by’umwihariko, gusa ntibyubahirijwe kuko kuva bajyaho bakomeje gushinjwa guhohotera abagore bababuza kugenda mu ruhame batari kumwe n’umuntu w’umugabo, kubategeka kudatwara imodoka no kubabuza kwiga n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .