00:00:00 IGIHE NETWORK KN KINYARWANDA EN ENGLISH FR FRANCAIS

Loni yongereye ibihano yafatiye RDC birimo kutagura intwaro

Yanditswe na IGIHE
Kuya 2 July 2022 saa 10:29
Yasuwe :

Akanama k’umutekano ka Loni kuwa Kane w’iki Cyumweru katoye umwanzuro wo kongera igihe cy’ibihano kafatiye Repubulika Iharanira Demokarasi ya Congo (RDC) byerekeranye n’intwaro, gukora ingendo no gufatira imitungo ya bamwe mu bakomeye muri iki gihugu.

Uyu mwanzuro uvuga ko mu Burasirazuba bwa RDC hari ikibazo cy’imitwe yitwaje intwaro ikomoka mu gihugu no hanze yacyo ikomeje guteza akaga abaturage b’abasivili. Uvuga ko ari ikibazo ku mahoro n’umutekano ku rwego mpuzamahanga.

Ibihugu byose kandi birasabwa guhagarika guha intwaro n’ubundi bufasha imitwe yose yitwaje intwaro muri Repubulika Iharanira Demokarasi ya Congo.

Umufaransa Nicolas de Rivière uri mu bateguye uyu mwanzuro, yavuze ko akanama k’umutekano ka Loni kagomba gufatira ibihano abagira uruhare bose mu guhungabanya umutekano w’Uburasirazuba bwa RDC.

U Burusiya, u Bushinwa n’ibindi bihugu bitatu byo muri Afurika ari byo; Ghana, Gabon na Kenya byarifashe. Ni ibihano byongerewe kugeza tariki 1 Nyakanga 2023.

Uhagarariye u Bushinwa muri Loni, Zhang Jun, yasobanuye ko ibihano by’aka kanama kuri RDC bimaze imyaka 18 bigamije guca intege ibikorwa by’ihohoterwa n’urugomo by’imitwe yitwaje intwaro ariko bitabujije iyi mitwe kwiyongera no kurusha ubushobozi ingabo za leta.

Muri RDC hakomeje imirwano y’umutwe wa M23 n’ingabo za Leta FARDC, Zhang yavuze ko ‘ingabo za FARDC zagizweho ingaruka n’ibihano ku by’intwaro kuko byatumye zitagira ubushobozi bwo guhangana n’imitwe yitwaje intwaro nka M23’.

Intumwa idasanzwe y’Umunyamabanga Mukuru wa Loni muri RDC, Bintou Keita, kuwa Gatatu yavuze ko M23 ifite ibikoresho byiza n’intwaro zirenze iz’igisirikare cya RDC na Monusco.

Ibi byatumye Zhang yemeza ko igihugu cye cyifashe kuko uyu mwanzuro utongerera ubushobozi FARDC bwo guhangana n’imitwe yitwaje intwaro.

Umuryango w’Abibumbye uherutse kugaragaza uburyo Repubulika Iharanira Demokarasi ya Congo yagiye ikoresha amanyanga mu kugura intwaro no kwishyura imyitozo ya gisirikare, ibyita ibikoresha byo kwifashisha mu buhinzi.

Raporo y’impuguke za Loni muri RDC yavuze ko “Nk’uko byemejwe na Banki Nkuru ya Congo n’abajenerali benshi ba FARDC, kubera ibihano igihugu cyafatiwe mu kugura intwaro, nticyashoboraga kugura ibikoresho bya gisirikare ku mugaragaro. Kwishyura izo ntwaro byagaragazwaga nko kwishyura ibikoresho by’ubuhinzi, ibintu byagifashije kugura intwaro rwihishwa n’amanyanga mu nyandiko”.

Ibyo ngo byakorwaga bitamenyeshejwe komite yashyizweho n’Akanama k’Umuryango w’Abibumbye gashinzwe umutekano, ngo ikurikirane iyubahirizwa ry’ibihano byafatiwe RDC.

Perezida Tshisekedi akomeje kumvikana yihunza ikibazo cy'imitwe yitwaje intwaro muri RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .