Loni yasabwe gufata ibyaha byakozwe n’ingabo za Armenia ku baturage ba Azerbaijan nka Jenoside

Yanditswe na Umwali Zhuri
Kuya 27 Gashyantare 2021 saa 09:36
Yasuwe :
0 0

Leta ya Azerbaijan yasabye umuryango mpuzamahanga gushyira igitutu kuri Armenia, igisirikare cyayo kikabazwa ubwicanyi ndengakamere bwakorewe abaturage bo mu gace ka Khojaly mu myaka 30 ishize.

Buri mwaka tariki 26 Gashyantare Azerbaijan yibuka urupfu rw’abaturage bayo bagera ku gihumbi bishwe urw’agashinyaguro n’ingabo za Armenia ubwo bari bari guhunga intambara hagati y’ibihugu byombi mu 1992.

Ubwo bwicanyi ni ingaruka z’intambara yatangiye mu 1988 hagati ya Armenia na Azerbaijan bapfa agace ka Nagorno-Karabakh kugeza n’ubu buri gihugu kivuga ko ari akacyo.

Mu 1992 ubwo intambara yari irimbanyije, Ingabo za Armenia zigaruriye umujyi wa Khojaly wari utuwemo n’abo mu bwoko bw’abanya-Armenia ndetse n’abo mu bwoko bw’abanya-Azerbaijan.

Abanya-Azerbaijan barahunze icyo gihe ariko bagwa mu maboko y’ingabo za Armenia zari zagose uwo mujyi, zirabarasa ku bushake kugeza ubwo hapfuye abagera ku gihumbi nk’uko imiryango mpuzamahnga irimo Human Rights Watch yabigaragaje.

Azerbaijan kuva ubwo yafashe ubwo bwicanyi nka Jenoside kuko abaturage bishwe batari bafite intwaro kandi bishwe kuko ari abo mu bwoko bw’abanya-Azerbaijan mu gihe Armenia yo ihakana ko ari ingabo zayo zabishe nubwo ubuhamya butandukanye bwagiye bubigaragaza.

Mu muhango wo kwibuka ku nshuro ya 29 ubwo bwicanyi, Guverinoma ya Azerbaijan yasabye amahanga ubufasha kugira ngo abagize uruhare muri ubwo bwicanyi bose bahanwe, ku isonga ingabo za Armenia n’abaziyoboraga.

Itangazo rigira riti “Ibikorwa bimwe byakozwe bitwaje ko ari amakimbirane ashingiye ku ntambara nyamara mu mategeko mpuzamahanga ibyakorewe muri Khojaly ni ibyaha bikwiriye kugira ubiryozwa ku giti cye ku babigizemo uruhare. Icyakora, kugeza n’ubu nta n’umwe mu babigizemo uruhare urabihanirwa muri Armenia.”

Azerbaijan ishingira ku magambo ya bamwe mu bahoze bayobora Armenia bagiye bemera uruhare rw’igihugu cyabo muri ubwo bwicanyi ariko ntibabihanirwe.

Batanze urugero rwa Serzh Sargsyan wari Minisitiri w’Ingabo ubwo ubwo bwicanyi bwabaga waje no kuyobora Armenia nyuma, wigeze kugira ati “Mbere y’ibyabaye Khojaly, abanya-Azerbaijan bakekaga ko abanya-Armenia ari abantu badashobora kugira icyo batwara abaturage. Twaberetse ko atari ko bimeze.”

Nubwo ku rwego mpuzamahanga ibyabereye Khojaly bitaremerwa nka Jenoside, Inteko zishinga amategeko z’ibihugu 17 hirya no hino ku Isi na Leta 23 zo muri Leta Zunze Ubumwe za Amerika zamaze kwemeza ko ibyabaye ari ubwicanyi ndengakamere bwibasiye inyokomuntu.

Mu 2010, urukiko rw’Umuryango w’Ubumwe bw’u Burayi rushinzwe uburenganzira bwa muntu rwafashe umwanzuro uvuga ko ibyabereye Khojaly bishobora kwitwa ibyaha by’intambara n’ibyibasiye inyokomuntu.

Dmitri Panin, Chargé d’ Affaires muri ambasade ya Azerbaijan iherereye muri Ethiopia ari nayo ishinzwe inyungu z’icyo gihugu mu bihugu birimo u Rwanda, yabwiye IGIHE ko bizeye ko umunsi umwe inzirakarengane z’ubwicanyi bwa Khojaly zizabona ubutabera.

Ati “Twizeye ko nyuma y’uko uduce twa Azerbaijan tuvanywe mu maboko ya Armenia, n’ubutabera buzagera aho bugatangwa.”

Ubwumvikane buke hagati ya Armenia na Azerbaijan bushingiye ku gace ka Nagorno-Karabakh na nyuma y’ibyabereye Khojaly, bukomeje kugira ingaruka hagati y’ibihugu byombi.

Muri Nzeri umwaka ushize imirwano yongeye kubura buri gihugu kivuga ko ubwo butaka ari ubwacyo. Yahoshejwe n’imishyikirano nyuma y’igitutu cy’amahanga. Icyakora imirwano yarangiye Armenia ihatakarije abasirikare basaga ibihumbi bine mu gihe Azerbaijan yahatakarije abasaga ibihumbi bibiri, mu gihe bivugwa ko abasivile basaga 150 bahatakarije ubuzima.

Ubusanzwe agace ka Nagorno-Karabakh ku rwego mpuzamahanga kazwi nk’aka Azerbaijan ariko karimo Repubulika yiyise iya Artsakh itemewe n’amategeko ishyigikiwe na Armenia, isaba kugira ubwigenge ikomekwa kuri Armenia.

Abaturage ba Khojaly ubwo bahungaga nyuma y'uko umujyi wabo wigaruriwe n'Ingabo za Armenia mu 1992
Ikarita igaragaza igihugu cya Amernia, icya Azerbaijan n'agace ka Nagorno -Karabakh kamaze imyaka isaga 30 gateza amakimbirane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .