00:00:00 IGIHE NETWORK KN KINYARWANDA EN ENGLISH FR FRANCAIS

Koreya ya Ruguru yaburiye Amerika nyuma y’ijambo ‘gashozantambara’ rya Biden

Yanditswe na Bukuru JC
Kuya 2 Gicurasi 2021 saa 11:38
Yasuwe :
0 0

Koreya ya Ruguru yihangangirije Leta zunze Ubumwe za Amerika nyuma y’ijambo Perezida Joe Biden aherutse kuvuga ryumvikanisha ko ashyize imbere guhangana na Koreya ya Ruguru mu gihe cyose itarareka gucura no kugerageza intwaro kirimbuzi.

Mu cyumweru gishize ubwo Biden yageze ijambo rye rya mbere ku Nteko Ishinga Amategeko, yavuze ko gahunda ya Koreya ya Ruguru na Iran yo gucura no kugerageza intwaro kirimbuzi ari ikibazo gikomeye ku mutekano wa Amerika n’isi.

Biden yavuze ko Amerika izafatanya n’inshuti zayo mu gushakira igisubizo gikwiriye ibyo bikorwa.

Umwe mu bayobozi bakuru muri Minisiteri y’ububanyi n’amahanga ya Koreya ya Ruguru, Kwon Jong Gun kuri iki Cyumweru yavuze ko ibyo Biden yavuze ari ubwirasi no gushaka gukomeza guhangana.

Ati “Ibyo yavuze bigaragaza neza umugambi we wo gukomeza politiki yo guhangana na Koreya ya Ruguru nkuko Amerika yagiye ibikora mu myaka isaga 50 ishize. Umuyobozi wa Amerika yakoze ikosa rikomeye ukurikije uko ibintu bimeze ubu.”

Kwon Jong Gun yavuze ko ubu noneho Koreya ya Ruguru yamenye aho Amerika ihagaze, ubwo igisigaye ari “ugufata ingamba zikwiriye kandi igihe kizagera Amerika yisange mu bihe bibi cyane.”

Associated Press ntabwo yatangaje neza ingamba Koreya ya Ruguru izafata mu by’ukuri icyakora bikekwa ko ari nk’uburyo bwo gushyira igitutu ku butegetsi bwa Biden ngo buhindure umurongo ku mubano wa Amerika n’icyo gihugu.

Ibiro bya Perezida wa Amerika kuri uyu wa Gatanu byatangaje ko hari politiki Guverinoma ya Biden ifite kuri Koreya ya Ruguru, kandi ko izaba itandukanye cyane n’iyo Donald Trump yakoreshaga yo gushaka ibiganiro ndetse n’iyo Barack Obama yakoresheje yo kwicecekera.

Koreya ya Ruguru yagerageje ibisasu kirimbuzi inshuro zitandukanye mu 2016 na 2017, ibyatumye nyuma Donald Trump agerageza ibiganiro na Kim Jong Un wa Koreya ya Ruguru, nubwo nta musaruro byatanze.

Koreya ya Ruguru yifuza ko gusabwa guhagarika igerageza ry’ibisasu kirimbuzi ryajyana no gukuriraho icyo gihugu ibihano mu by’ubukungu cyagiye gifatirwa mu bihe bitandukanye.

Perezida wa Koreya ya Ruguru, Kim Jong Un

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .