Uburyo Kim Jong Un yaciye mu rihumye Loni akagura imodoka zihenze za Mercedes Benz

Yanditswe na Ndayikunda Josué
Kuya 19 Nyakanga 2019 saa 09:50
Yasuwe :
0 0

Umuryango w’Abibumbye washyiriyeho ibihano Koreya ya Ruguru byo kutagurishwaho ibicuruzwa bihenze cyane birimo n’imodoka kubera gukora intwaro za kirimbuzi.

Nyamara, Perezida wa Koreya ya Ruguru, Kim Jong Un akunze kugaragara agendera mu modoka za Mercedes Benz zifite agaciro k’ibihumbi 500 by’amadorari ya Amerika.

Ubushakashatsi bwakozwe n’Ikigo Center for Advanced Defense Studies (C4ADS) bwagaragaje ko tariki ya 14 Kamena 2018 hari ubwato bwavanye imodoka ebyiri zo mu bwoko bwa Mercedes-Maybach S600 ku cyambu cya Rotterdam bunyura mu bihugu bitandatu mbere y’uko bushyitsa izo modoka i Pyongyang, Umurwa Mukuru wa Koreya ya Ruguru.

Ubu bwoko bw’imodoka burihariye kuko CNN itangaza ko bufite ibyicaro byiza bishobora mu gukorerwaho massage, ntabwo ipfumurwa n’amasasu n’ibindi.

Ubushakashatsi bwakozwe na C4ADS bugaragaza ko ubwato bwari butwaye imodoka ebyiri za Mercedes-Maybach S600 zavuye ku cyambu cya Rotterdam bwerekeje ku cyambu cya Dalian mu Bushinwa. Bwahavuye bwerekeza Osaka mu Buyapani mbere y’uko bugera Busan muri Koreya y’Epfo.

Ubu bwato bwitwa DN5505 bwavuye Busan buhita buburirwa irengero. C4DS itangaza ko ubu bwato bwahingukiye Nakhodka mu Burusiya bukahasiga izo modoka za Mercedes, nazo zikagezwa muri Koreya ya Ruguru n’indege.

Ubu bwato bwa DN5505 bwari bwaburiwe amerekezo bwongeye kugaragara nyuma y’iminsi 18 buri Busan n’ubundi aho bwaburiye. Gusa, bwagaragaye butwaye nyiramugengeri nyamara mbere bwari butwaye imodoka.

C4DS ivuga ko indege zo mu bwoko bwa Ilyushin-76 zishobora kuba ari zo zajyanye imodoka za Mercedes muri Koreya ya Ruguru zizivanye Nakhodka mu Burusiya.

Uruganda rwa Daimler rukora Mercedes rushinjwa kubusanya n’ibihano Umuryango w’Abibumbye wafatiye Koreya ya Ruguru byo kutagurishwaho ibicuruzwa bihenze.

Icyakora urwo ruganda rwahakanye ibyo rushinjwa, ruvuga ko rumaze imyaka 15 rudakorana na Koreya ya Ruguru, ko izo Mercedes zabonetse zishobora kuba zarahageze hakoreshejwe ubundi buryo badafiteho ububasha.

C4ADS yemeza ko Koreya ya Ruguru yaguze ibicuruzwa bihenze bifite agaciro ka miliyoni 191 z’amadorari ya Amerika hagati ya 2015 na 2017 kandi bitemewe kubera ibihano yafatiwe.

Kim Jong Un akunze kugaragara mu modoka yo mu bwoko bwa Mercedes-Maybach S600 Guard
Ubu bwoko bw'imodoka buri mu buhenze cyane
Imbere muri Mercedes-Maybach S600 Guard ni uku haba hameze
Mercedes-Maybach S600 Guard ntitoborwa n'amasasu
Ifite imisego yihariye ishobora no gukorerwaho massage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza