Israel: Hakomeje kugaragara abandura COVID-19 barakingiwe

Yanditswe na IGIHE
Kuya 21 Mutarama 2021 saa 08:58
Yasuwe :
0 0

Minisiteri y’Ubuzima muri Israel yatangaje ko muri iki gihugu hakomeje kugaragara umubare munini w’abandura icyorezo cya COVID-19 kandi barahawe urukingo rwacyo ndetse harimo n’abaruhawe inshuro ebyiri nk’uko amabwiriza abiteganya.

Imibare igaragaza ko muri Israel abantu barenga 12 400 basanzwemo COVID-19 kandi barayikingiwe muri bo harimo 69 bari barahawe urukingo inshuro ebyiri.

Minisiteri y’Ubuzima muri iki gihugu yatangaje ko mu bantu ibihumbi 189 bahawe urukingo rwa COVID-19 rwakozwe na Pfizer/BioNTech abagera kuri 6,6% bayanduye nyuma yo gukingirwa.

Muri aba umubare munini ni uw’abanduye iki cyorezo nyuma y’igihe gito bahawe uru rukingo, cyane ko rwari rutaratangira kuzamura ubudahangarwa bw’umubiri wabo, gusa hakaba hari impungenge ku bagera ku 1410 bayanduye nyuma y’ibyumweru bibiri birenga bahawe urukingo.

Ibi biteye impungenge kuko Pfizer igaragaza ko urukingo rwayo rutangira gukora nyuma y’iminsi iri hagati ya 15 na 21 umuntu aruhawe.

Ku wa Mutarama uhagarariye ibikorwa byo guhangana na COVID-19 muri Israel yagaragarije Minisiteri y’Ubuzima ko urukingo rwa Pfizer rushobora kuba rudatanga umusaruro nk’uko babyibwira ibi bikarushaho kwiyongera iyo umuntu aruhawe inshuro imwe gusa.

Kaminuza ya Johns Hopkins igaragaza ko umuntu wakingiwe indwara iyo ari yo yose urukingo rwongerera umubiri we ubwirinzi kandi rugatoza abasirikare b’umubiri we uko bazajya bahangana na virusi itera iyo ndwara.

Igaragaza ko umuntu wakingiwe COVID-19, mu gihe urukingo rwakoze neza adashobora kuyandura ngo agaragaze ibimenyetso kuko umubiri uba warwanyije virusi yayo.

Ubwo urukingo rwa COVID-19 rwatangiraga gutangwa muri Isiraheli, Minisitiri w'Intebe w'iki gihugu, Benjamin Netanyahu ari mu baruhawe mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .