Inzobere zagaragaje ko hakwiye gutangwa inkingo za Covid-19 zitandukanye hashingiwe ku myaka

Yanditswe na IGIHE
Kuya 1 Ukuboza 2020 saa 06:43
Yasuwe :
0 0

Inzobere mu bijyanye n’ubuzima zagaragaje ko byaba byiza habonetse inkingo zitandukanye za Covid-19 kandi abantu bakazihabwa hashingiwe ku byiciro by’imyaka babarizwamo.

Mu kwezi gushize nibwo AstraZeneca ifatanyije na Kaminuza ya Oxford batangaje ko basoje igerageza ku rukingo rwabo rwa Coronavirus, aho babonye ko rushobora kuyikingira ku kigero cya 70% ndetse ayo mahirwe ashobora kwiyongera kugera kuri 90%.

Bitandukanye n’inkingo zakozwe na Pfiser na BioNTech ndetse na Moderna, urukingo rwa Kaminuza ya Oxford hamwe na AstraZeneca rwarishimiwe cyane kuko rwo rushobora gukorwa mu buryo buhendutse kandi ntirurindire kubikwa ahantu hari ubukonje bwinshi.

Nubwo urukingo rwa AstraZeneca rwagaragaje ko rushobora gukingira iki cyorezo ku ku kigero cya 90%, hagaragaye impungenge kuko abari bageragerejweho urukingo bose nta wari urengeje imyaka 55 kandi ubusanzwe byaragaragaye ko Coronavirus yibasira cyane abageze mu zabukuru.

Prof Helen Fletcher wigisha mu Bwongereza mu bijyanye n’ubudahangarwa bw’umubiri, atanga inama ko inkingo zose zimaze kuboneka zakwifashishwa hashingiwe ku cyo buri rukingo rwafasha itsinda ry’abantu runaka bitewe n’imyaka bafite. Yavuze ko iki ari ikintu gisanzwe kuko nko mu Bwongereza ubu hatangwa inkingo eshatu zitandutanye z’ibicurane ku bana, abakuze ndetse n’abageze mu za bukuru.

Yashimangiye ko ubu buryo bwo gutanga inkingo zitandukanye hashingiwe ku myaka bitanga igisubizo cyiza kandi kirambye ku buzima bw’abantu.

Inzobere mu by’inkingo muri Kaminuza ya Bristol, Prof. Adam Finn, wanifashishijwe mu igerageza ry’urukingo rwa Oxford na AstraZeneca ahamya ko inkingo zose zimaze kuboneka zikora kugira ngo zikingire abantu kwandura icyorezo cya Coronavirus ariko yongeraho ko hataramenyekana neza urushobora gufasha cyane abageze mu zabukuru cyangwa niba n’inkingo ubwazo zifite ikintu kinini zitandukaniyeho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .