00:00:00 IGIHE NETWORK KN KINYARWANDA EN ENGLISH FR FRANCAIS

Abadepite ba Amerika basabwe gusiba TikTok muri telefone zabo

Yanditswe na Bukuru JC
Kuya 29 Ukuboza 2022 saa 09:58
Yasuwe :

Abadepite n’abakozi b’Inteko Ishinga Amategeko ya Amerika basabwe gusiba urubuga nkoranyambaga rwa Tiktok muri telefone zabo ndetse ntirugaragara mu bikoresho by’ikoranabuhanga iyo nteko itanga ku bakozi bayo.

TikTok, ni urubuga rushamikiye kuri Sosiyete ByteDance Ltd y’Abashinwa. Ni rumwe mu mbuga nkoranyambaga zikunzwe kuri ubu, dore ko rukoreshwa n’abasaga miliyari ku kwezi.

Ubutumwa bwabonywe n’ikinyamakuru NBS cyo muri Amerika, buvuga ko abakozi b’Inteko babujijwe gukoresha TikTok kubera ubwoba bw’uko amakuru bwite y’abayikoresha ashobora gukoreshwa n’u Bushinwa mu bindi.

Ubutumwa abakozi bahawe bugira buti “Niba ufite TikTok mu gikoresho cy’ikoranabuhanga ukoresha mu Nteko, uzamenyeshwa ko usabwe kuyikuramo.”

Leta 19 mu zigize Amerika nazo zafashe icyemezo nk’icyo, aho abakozi ba Leta batemerewe gukoresha TikTok ku bikoresho by’ikoranabuhanga bahawe na Leta.

Umuvugizi wa TikTok , Brooke Oberwetter, yavuze ko kuvana TikTok muri telefone z’abakozi ba Leta ntacyo bizatanga, kuko n’ubusanzwe ari bake bakoresha izo telefone za Leta kuri TikTok.

Brooke ahubwo yavuze ko uyu mwanzuro ari impamvu za politiki aho kuba impamvu z’umutekano.

Hashize igihe Amerika ishaka gukumira ikoreshwa rya TikTok muri icyo gihugu, bavuga ko u Bushinwa bushobora kuyifashisha buneka Abanyamerika.

Nubwo TikTok yabujijwe Abadepite bo muri Amerika, si ko bimeze ku Basenateri.

TikTok ni rumwe mu mbuga nkoranyambaga zigezweho muri Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .