Inkundura yo gukomanyiriza ibicuruzwa by’u Bufaransa yafashe indi ntera mu bihugu by’abayisilamu

Yanditswe na Uwimana Abraham
Kuya 27 Ukwakira 2020 saa 09:24
Yasuwe :
0 0

Inkundura yo gukomatanyiriza ibicuruzwa by’u Bufaransa mu bihugu bigendera ku mahame y’idini ya Islam ikomeje gufata indi ntera, nyuma y’aho Perezida Emmanuel Macron agaragaje ko ashyigikiye ibishushanyo (cartoons) by’intumwa y’Imana Mohammed, ibintu bifatwa nk’ikizira muri dini.

Ibi Macron yabitangaje mu muhango wo guherekeza umwarimu wo mu mashuri yisumbuye wishwe mu cyumweru gishize akaswe umutwe mu cyafashwe nk’igitero cy’iterabwoba cyabereye mu Majyaruguru y’Umurwa Mukuru Paris.

Macron yavuze ko u Bufaransa butazarekeraho gukoresha ibishushanyo cyangwa ikindi cyose mu kurwanya abahezanguni bitwaza idini ya Islam bagakora ibikorwa by’iterabwoba.

Uyu mwarimu Samuel Paty, yishwe nyuma y’uko yerekanye ibishushanyo by’Intumwa y’Imana Mohammed mu isomo rigendanye n’ubwisanzure mu kuvuga ibyo umuntu atekereza.

Bamwe mu bayobozi b’ibihugu bitandukanye cyangwa uduce dusanzwe tuzwiho kubamo Abayisilamu benshi, batangiye kugaragaza ku mugaragaro ko badashyigikiye ibyakozwe na Perezida w’u Bufaransa ndetse hatangira igisa n’imyigaragambyo ibyamagana.

Perezida wa Turikiya, Recep Tayyip Erdogan, mu ijambo yavugiye mu Murwa Mukuru Ankara ku wa Mbere yahamagariye abantu bose kutagura cyangwa ngo bagurishe ibicuruzwa bikomoka mu Bufaransa.

Yagize ati “Ndahamagarira abantu bose, ntimugure ibicuruzwa by’Abafaransa, mwibigura, abayobozi bo mu Burayi bakwiye kuvuga oya kuri Macron n’ikwirakwiza rye ry’urwango.”

Iyi nkundura yo gukomatanyiriza ibicuruzwa by’u Bufaransa kandi iri no mu bindi bice bitandukanye harimo Kuwait, Jordanie ndetse no muri Qatar, aho isoko rikomeye ryaho rya Al Meera rifite amashami agera kuri 50 mu bihugu by’Abarabu naryo ryahagaritse icuruzwa ry’ibyo mu Bufaransa.

Uretse ibyo kandi hari n’ibindi bitishimiye iyi mvugo ya Macron birimo Pakistan, Iran ndetse na Misiri, na byo binenga imigirire y’u Bufaransa yo gushyigikira ibishushanyo by’Intumwa Mohammed.

Minisitiri w’Ububanyi n’Amahanga w’u Bufaransa yavuze ko iri komatanyirizwa ry’ibicuruzwa bya bwo ridakwiriye ndetse asaba ko ryahagarara avuga ko ibyo Macron yavuze byari bigamije gushyigikira uburenganzira bwo kuvuga icyo umuntu atekereza, guca ivangura ndetse no guhagarika urwango.

Yongeyeho ko byari bigamije kurwanya ubuhezanguni muri Islam, kandi yabikoze ashyigikiye abayisilamu bo mu Bufaransa kuko nabo ari igice kinini cy’abagize sosiyete y’u Bufaransa, amateka ya bwo ndetse na repubulika.

Ibishushanyo bya Mohammed uyu mwarimu Paty yerekanye mu ishuri, byerekanywe bwa mbere mu kinyamakuru cya Charlie Hebdo mu 2015, bivugwaho ko byatumye haba ibitero by’iterabwoba byaguyemo abantu 12.

Perezida wa Turikiya yikomye Macron nyuma y'imvugo ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .