00:00:00 IGIHE NETWORK KN KINYARWANDA EN ENGLISH FR FRANCAIS

Impaka z’urudaca mu kiganiro cya Macron na Le Pen kuri televiziyo

Yanditswe na Israel Ishimwe
Kuya 21 April 2022 saa 12:00
Yasuwe :

Emmanuel Macron na Marine Le Pen bahataniye kuyobora u Bufaransa bateranye amagambo mu kiganiro mpaka cyo kuri televiziyo cyabaye ku mugoroba wo ku wa 20 Mata 2022.

Iki kiganiro cy’isaha n’iminota 45 cyahuje abakandida babiri bageze mu cyiciro cya nyuma mu matora y’Umukuru w’Igihugu mu Bufaransa ateganyijwe ku wa 24 Mata 2022.

Ni ku nshuro ya kabiri, Emmanuel Macron ubarizwa mu Ishyaka La République En Marche na Marine Le Pen wo mu rya Le Rassemblement National bahuriye mu kiganiro. Mu matora yo mu 2017 na bwo bahuriye ku meza amwe ariko Macron yitwara neza ugereranyije n’uwo bari bahanganye.

Icyo gihe Le Pen yagiye mu kiganiro asa n’utiteguye ndetse afite igihunga, ariko muri uyu mwaka yaserutse agaragaza impinduka, anitwara neza kuva ikiganiro gitangiye kugera ku musozo wacyo.

Mu kiganiro cyabo cyo kuri uyu wa Gatatu, abakandida bombi bibanze ku ngingo zitandukanye zirimo izirebana n’ikiguzi cy’imibereho, ubukungu, intambara yo mu Burusiya, imihindagurikire y’ikirere n’abimukira.

Impinduka zihuse mu izamuka ry’ibiciro by’ibikomoka ku ngufu no mu maduka byibanzweho mu gihe cyo kwiyamamaza, biri mu byatangiriweho mu kiganiro mpaka cya Macron na Le Pen.

Mu kiganiro hagati, Macron yakunze guca Le Pen mu ijambo ubwo yabaga ari kuvuga.

Le Pen yatangaje ko abaturage bo mu Bufaransa bagera kuri 70% bizera ko urwego rw’imibereho yabo rwaguye mu myaka itanu ishize. Yabijeje ko azaba perezida wimakaza amahoro n’ubuvandimwe.

Ati “Abafaransa bagomba guhabwa umwanya w’imbere mu gihugu cyabo.’’

Macron yasobanuye ko u Bufaransa kimwe n’ibindi bihugu bwahuye n’icyorezo cya COVID-19, gikurikirwa n’intambara y’u Burusiya muri Ukraine.

Yavuze ko yagerageje kuyobora u Bufaransa muri ibyo bibazo ndetse agamije kubwubaka bukongera kuba igihugu cy’igihangange.

Abajijwe icyo ateganya gukora muri manda ya kabiri, Macron yavuze ko azakomereza ku byo yakoze.

Le Pen bahanganye yahise atangira gukomoza ku byo atakoze mu myaka itanu amaze ku butegetsi.

Ku kijyanye n’ubukungu, yavuze ko yatangiye gufata ingamba zizafasha u Bufaransa guhangana n’ikibazo cy’izamuka ry’ibiciro binyuze mu gukuraho imisoro ku birimo ibikomoka kuri peterori.

Ku ngingo yo kugabanya umusoro w’ibikomoka ku ngufu, ni ho abakandida batangiye guterana amagambo, bagaragaza kutabyumva kimwe.

Macron yakunze kuvuga ko ibitekerezo bya Le Pen bidashoboka. Ati “Ndashaka gusubiza Abafaransa amafaranga yabo.’’

Indi ngingo yazamuye impaka ni iyerekeye intambara y’u Burusiya muri Ukraine.

Macron yavuze ko u Burusiya bwahisemo “kunyura inzira idakwiye”, ariko uruhare rw’u Bufaransa n’u Burayi rwari urwo guha Ukraine ubufasha mu bya gisirikare no gufasha impunzi.

Le Pen yanenzwe umubano afitanye n’u Burusiya no kuba yarafashe inguzanyo muri banki yo muri iki gihugu mu bikorwa by’ishyaka rye. Uyu mugore we yavuze ko guha Ukraine intwaro byatuma u Bufaransa buba nk’umufatanyacyaha mu ntambara.

Macron yahise amwibutsa ko ari umwe mu banyepolitiki washyigikiye igitekerezo cy’u Burusiya cyo kwiyomekaho agace ka Crimea kari mu 2014. Amagambo ya Le Pen yatumye mu 2017 abuzwa kwinjira muri Ukraine.

Macron yamubwiye ko "Iyo uvuga u Burusiya uba uganisha kuri banki yawe."

Le Pen yasubije ko yasabye inguzanyo mu Burusiya kuko nta banki yo mu Bufaransa yari guha ishyaka rye amafaranga.

Aha Macron yamusubije ko iyo Abafaransa bakeneye inguzanyo batajya kuyisaba mu Burusiya.

Indi ngingo yazamuye impaka ni ijyanye ni imyaka y’ikiruhuko cy’izabukuru, Macron yagaragaje ko igomba kuvanwa kuri 62 ikaba 65 mu gihe Le Pen yifuza ko iguma kuri 62.

Macron na Le Pen kandi ntibumvikanye ku ngingo y’abimukira. Le Pen yijeje gukoresha amatora ya kamarampaka k’ugomba kuguma mu Bufaransa n’ukwiye kubuvamo; ananenga icyo yise ‘akavuyo mu bwinshi bw’abimukira’ kateje umutekano muke.

Yanavuze ko hakwiye kubaho guhagarika kwambara igitambaro gipfuka umutwe cyizwi nka ‘Hijab’, avuga ko abagore bagomba gukurwaho igitutu cy’imyemerere ya Kiyisilamu.

Macron yahise amubwira ko bidakwiye guhuza Islam n’ingengabitekerezo yayo. Yavuze ko politiki ya Le Pen yateza intambara y’abasivili kandi ari ubugambanyi ku ndangagaciro u Bufaransa bugenderaho.

  Macron arahabwa amahirwe

Abakurikiranye ikiganiro cya Macron na Le Pen benshi muri bo bahurije ku kuba yitwaye neza ariko ikusanyabitekerezo [poll] ryanyujijwe mu bitangazamakuru birimo BFMTV na L’Express ryerekana ko Macron ari we watsinze.

BBC yanditse ko ayo majwi yerekana ko 59% by’abarebye ikiganiro banyuzwe n’uburyo Macron yitwaye imbere ya Le Pen.

Emmanuel Macron umaze imyaka itanu ayobora u Bufaransa, arahabwa amahirwe yo gukomeza kuyobora igihugu no muri manda ya kabiri.

Icyiciro kibanziriza icya nyuma cy’amatora yabaye ku wa 10 Mata 2022 cyatsinzwe na Macron wagize amajwi 27.85% mu gihe Le Pen yabonye 23.15%.

Ubwo aba bakandida bombi baheruka guhurira mu matora mu 2017, Macron yatsinze ku majwi 66%.

Macron aramutse yongeye gutorerwa kuyobora u Bufaransa yaba akuyeho agahigo kamazeho imyaka 20, ko nta mukuru w’igihugu utorerwa manda ebyiri zikurikirana. Perezida uheruka kubikora ni Jacques Chirac, icyo gihe hari mu 2002.

Emmanuel Macron na Marine Le Pen bagiye impaka z'urudaca mu kiganiro cyabahuje kuri televiziyo mbere yo kwinjira mu matora y'Umukuru w'Igihugu ateganyijwe ku wa 24 Mata 2022

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .