00:00:00 IGIHE NETWORK KN KINYARWANDA EN ENGLISH FR FRANCAIS

Imodoka zikoresha amashanyarazi zaguzwe mu Bushinwa ziyongereyeho 40% mu 2024

Yanditswe na Jean de Dieu Tuyizere
Kuya 13 January 2025 saa 03:30
Yasuwe :

Ihuriro ry’inganda zikora imodoka mu Bushinwa, ryagaragaje ko imodoka zikoresha amashanyarazi zagurishijwe n’iki gihugu, ziyongereye ku gipimo kirenga 40% mu mwaka wa 2024, ugereranyije n’uwabanje.

Raporo ngarukamwaka y’iri huriro yagaragaje ko muri uyu mwaka, mu Bushinwa muri rusange haguzwe imodoka miliyoni 31,4, ziyongereye ku gipimo cya 4,5% ugereranyije n’umwaka wa 2023.

Imodoka zitwara abagenzi mu buryo bwa rusange u Bushinwa bwohereje mu mahanga, ziyongereyeho hafi 20% zigera kuri miliyoni eshanu.

Iyi raporo isobanura ko imodoka zikoresha icyarimwe umuriro w’amashanyarazi ndetse n’ibikomoka kuri peteroli (mazutu na lisansi), zageze kuri miliyoni 1,28, ziyongeraho 6,7% ugereranyije n’umwaka wa 2023.

Imodoka zikoresha ibikomoka kuri peteroli zo zagabanyutseho 17% mu mwaka wa 2024, zigera kuri miliyoni 11,6 zivuye kuri miliyoni 14 mu 2023.

Ubwiyongere bw’igurwa ry’imodoka z’u Bushinwa zikoresha umuriro w’amashanyarazi rihangayikishije ibihugu bifite inganda zikomeye zikoresha ibikomoka kuri peteroli nka Leta Zunze Ubumwe za Amerika n’ibindi bihuriye mu muryango w’Ubumwe bw’u Burayi (EU).

Mu 2024, Amerika yateguje ko mu rwego rwo guca intege igurwa ry’imodoka ziva mu Bushinwa, izazishyiriraho umusoro mwinshi, uri ku gipimo cya 100%.

Mu Buyapani ho uruganda Nissan na Honda zagizweho ingaruka n’igurwa ry’imodoka zikoresha umuriro w’amashanyarazi, zemeranyije kwihuza kugira ngo zishobore guhatana ku isoko mpuzamahanga.

Imodoka zikoresha amashanyarazi zo mu Bushinwa zikomeje kugurwa cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .