Imitungo y’abaherwe 10 ba mbere ku Isi yagabanutseho miliyari $44, Jeff Bezos na Elon Musk batakaje menshi

Yanditswe na IGIHE
Kuya 4 Nzeri 2020 saa 10:08
Yasuwe :
0 0

Igabanuka ry’agaciro k’imigabane y’ibigo bikomeye ku isoko, ryatumye umutungo w’abaherwe 10 ba mbere ku Isi ugabanukaho miliyari 44$, aho Jeff Bezos washinze Amazon.com Inc. aza imbere kuko yatakaje miliyari hafi 9$, naho Elon Musk nyiri Tesla we umutungo we ugabanukaho miliyari 8.5$.

Ni igabanuka ribayeho nyuma y’uko agaciro k’imigabane iri ku isoko kakomeje kugabanuka guhera muri Kamena uyu mwaka, nk’uko bigaragazwa na Bloomberg.

Ihindagurika ry’umutungo w’aba baherwe ba mbere ni kimwe mu bimenyetso by’itandukaniro hagati y’umutungo nyakuri umuntu afite n’umutungo abarirwa hagendewe ku giciro kiri ku isoko muri ako kanya.

Mu gihe icyorezo cya Coronavirus gikomeje guca ibintu hirya no hino ku isi, ubucuruzi bwarahungabanye, ariko abakora mu rwego rw’ikoranabuhanga bibaha amahirwe mashya y’ubucuruzi, kuko uko abantu bagenda basabwa kuguma mu ngo, niko bifashishaga ikoranabuhanga kugira ngo babone ibyo bakeneye, byaba serivisi cyangwa ibicuruzwa.

Ibyo byatumye mu minsi ishize, Musk na Mark Zuckerberg uyobora Facebook Inc. binjira mu batunze miliyari zisaga 100$, ku buryo hari ubwo mu munsi umwe imigabane ya Tesla na Facebook Inc. yazamutseho miliyari 4$.

Ni mu gihe Bezos uyoboye abaherwe ba mbere ku Isi, we mu minsi ishize yinjiye muri miliyari zisaga 200$, mu gihe uwahoze ari umugore we baheruka gutandukana, MacKenzie Scott, aheruka kuba umugore wa mbere ukize ku isi.

Kuri uyu wa Kane nibura abaherwe 500 ba mbere ku isi, muri uyu mwaka bari bamaze kubonamo miliyari 830$ ziyongereye ku mutungo wabo, nk’uko bigaragazwa na Bloomberg Billionaires Index. Uwinjije menshi muri bo ni Bezos, wazamutseho miliyari 83$, naho Musk umutungo we uzamukaho hafi miliyari $69.

Kugeza ubu abaherwe 10 ba mbere ni:

1. Jeff Bezos: Miliyari 198$ (yagabanutseho miliyari 8.95$)
2. Bill Gates: miliyari 124$ (yagabanutseho miliyari 2.85$)
3. Mark Zuckerberg: miliyari 110$ (yagabanutseho miliyari 4.19$)
4. Elon R Musk: miliyari 96.2$ (yagabanutseho miliyari 8.49$)
5. Bernard Arnault: miliyari 88.0$ (yazamutseho miliyoni 114$)
6. Warren Buffett: miliyari 82.5$ (yagabanutseho miliyari 1.39$)
7. Mukesh Ambani: miliyari 81.0$ (yagabanutseho miliyoni 834$)
8. Steve Ballmer: miliyari 78.0$ (yagabanutseho miliyari 4.83$)
9. Larry Page: miliyari 77.4$ (yagabanutseho miliyari 3.61$)
10. Sergey Brin: miliyari 75.0$ (yagabanutseho miliyari 3.50$)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .