00:00:00 IGIHE NETWORK KN KINYARWANDA EN ENGLISH FR FRANCAIS

Imbunda ku isonga y’ibihitana urubyiruko rwinshi muri Amerika

Yanditswe na IGIHE
Kuya 30 May 2022 saa 07:32
Yasuwe :

Gutunga intwaro by’umwihariko imbunda muri Leta zunze Ubumwe za Amerika bikomeje kuba ikibazo cy’ingutu kidahwema gutwara ubuzima bwa benshi. Inyigo yakozwe muri iki gihugu mu 2020, yagaragaje ko intwaro ziri ku isonga mu kwica urubyiruko rwinshi rw’Abanyamerika.

Iyi nyigo yerekana ko abana, ingimbi n’abangavu 4638 bishwe n’intwaro muri uriya mwaka, ni ukuvuga nibura abantu 5,4 ku bantu 100.000. Ubwiyongere bw’uyu mubare bukomeje gutanga impuruza ku kibazo cy’intwaro kitarabonerwa igisubizo dore ko mu minsi ishize habaye igitero ku ishuri ry’inshuke rya Uvalde muri Texas, kigahitana abagera kuri 21 barimo abana 19.

Iki gitero cyazamuye ibiganiro ku gutunga intwaro kuruta uko byigeze bibaho muri Amerika, bamwe barasaba ko amategeko ajyanye na byo yavugururwa. Umuntu wese ufite imyaka 18 yemerewe kuba yagura imbunda nto n’amasasu.

Raporo ya Small Arms yerekana ko mu baturage 100 harimo intwaro 120,5 bivuze ko intwaro ziri mu baturage zibaruta. Ikurikirwa na Yemen aho mu baturage 100 harimo intwaro 52,8, Canada ni 34,7, u Bufaransa n’u Budage mu baturage 100 harimo intwaro 19,6. Imibare ya 2018 yerekana ko mu baturage miliyoni 330 ba Leta zunze Ubumwe za Amerika harimo intwaro miliyoni 393,3.

Ugereranyije usanga abicwa barashwe cyangwa birashe muri Amerika baruta abagwa mu mpanuka zo mu muhanda. Mu 2020 abahitanywe n’impanuka ni 4036 ni ukuvuga ko abiyahuye bakoresheje imbunda baruta aba ho 332. Ibi bisobanuye ko igihugu cyashyize imbaraga mu mutekano wo mu muhanda kurenza gutunga imbunda.

Abirabura b’abanyamerika ni bo bugarijwe cyane no kuraswa muri Amerika kuko abaraswa bakubye inshuro enye abazungu.

Amerika ni cyo gihugu mu bikize byo mu Burengerazuba bw’Isi gipfiramo abantu benshi bazize intwaro ku mubare wo hejuru usa cyangwa urenga uwa byinshi mu bihugu birimo intambara hirya no hino ku Isi.

Muri rusange, mu 2020 abantu bishwe n’intwaro muri Amerika bagera ku 45.222. Iyi mibare yiganjemo abishwe n’intwaro barashwe n’abagabye ibitero, abazikoresheje biyahura n’abarashwe bitagambiriwe barimo abarashwe n’inzego z’umutekano cyangwa ku zindi mpamvu zitamenyekanye.

Iyi mibare kandi ntirimo abapfuye bigizwemo uruhare no kuraswa ariko ntibyemezwe ko ari byo by’ibanze byabishe. Gusa ariko imibare inerekana ko intwaro nyinshi zikoreshwa mu kwiyahura kuko mu 2020 abiyahurishije intwaro bari 24.292 bingana na 54% by’abishwe n’intwaro bose.

Impfu zitewe no kurasana muri Amerika kandi zikomeje kwiyongera ku buryo budasanzwe. Mu 2020 ni bwo hapfuye abantu benshi barashwe kuva mu 1968 bagera ku 19.384. Aba barenze agahigo kari gafitwe n’umwaka wa 1993 wishwemo abantu 18.253 barashwe ni ukuvuga ubwiyongere bwa 34% ugereranyije imyaka yombi.

Mu myaka itanu gusa abishwe barashwe muri Amerika biyongereyeho 49% naho mu myaka 10 biyongeraho 75%.

Intwaro zikomeje gukora ibara muri Leta zunze Ubumwe za Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .