Iki kigo cyatangaje ko kigiye gushyira imbaraga mu ikorwa ry’izo drones hifashishijwe ikoranabuhanga rya 3D, rituma hakorwa nyinshi mu gihe gito.

Drones z’iki kigo ziri mu zifashishwa mu rugamba Ukraine ihanganyemo n’u Burusiya, zikaba zaratanzwe nk’impano n’ibihugu birimo u Bwongereza.

Helsing yatangaje ko muri uyu mwaka igiye gushyira imbaraga mu gukora izo drones nyinshi zishoboka kuko abazikeneye babaye benshi, kandi zikaba zidahenze ukurikije izindi ziri ku isoko binganya ubushobozi.

Izi drones zifite ikoranabuhanga rya AI, rizifasha gukomeza gukora no gushaka inzira y’aho umwanzi ari n’iyo ryahura n’irindi koranabuhanga nk’irikoreshwa n’u Burusiya, rituma akenshi drones zoherejwe ku rugamba zitakaza ihuzanzira (network).

Iza Helsing bavuga ko n’iyo zakwinjirirwa zigatakaza ihuzanzira, AI irimo izajya izifasha kongera kwisuganya zikamenya aho uwo zoherejwe kurwanya aherereye.

Ubu bwoko bwa drones bufite ubushobozi bwo kugenda ibirometero 100 zitaragira ikibazo. Ikigo Helsing cyashinzwe mu 2021. Kuri ubu kibarirwa agaciro ka miliyari 4.9 z’Ama-Euro.

Iki kigo cyatangaje ko gishaka gufungura ishami mu Bwongereza mu myaka itanu iri imbere.

Drones zo mu bwoko bwa HX-2 zizwiho gukoresha ikoranabuhanga rya AI