Igisirikare cya Amerika cyashyize kivuga ku myigaragambyo yabereye ku Nteko

Yanditswe na Muhonzire Sylvine
Kuya 13 Mutarama 2021 saa 12:52
Yasuwe :
0 0

Umuyobozi w’abagaba b’imitwe y’ingabo mu gisirikare cya Leta Zunze Ubumwe z’Amerika, Mark Milley, yashyize agira icyo avuga ku myigaragambyo yabereye ku Nteko Ishinga amategeko, aho yabyise guhonyora itegeko nshinga ndetse ahamagararira igisirikare kuryamira amajanja ku munsi w’irahira rya Perezida watowe Joe Biden tariki 20 Mutarama.

Nyuma y’icyumweru iyi myigaragambyo ibaye, nibwo igisirikare cyagize icyo kivuga, aho kuri uyu wa Kabiri hasohotse ibaruwa isinyweho na Mark Milley inenga bikomeye iyi myigaragambyo, aho yagira iti “Imvururu zabereye Washington DC tariki 6 Mutarama 2021, zari igitero ku bagize Inteko Ishinga Amategeko ku nzu ubwayo ndetse no ku Itegeko Nshinga ryacu.”

Iyo baruwa ikomeza igira iti “Uburenganzira bwo kuvuga icyo ushaka ntabwo bwemerera uwo ari we wese kwangiza, guhamagarira rubanda kwigomeka ku butegetsi ndetse no kwigaragambya.”

Abajyanama ba gisirikare ndetse n’abasirikare bakuru muri icyo gihugu, babwiye ingabo ko zigomba kuryamira amajanja ku munsi Biden azarahiriraho, zikarinda ubusugire bw’Amerika.

Bagize bati “Nk’igisirikare, tugomba kugira icyo dukora ku busugire bw’igihugu. Dushyigikira itegeko Nshinga, rero ikintu cyose cyakwangiza ishyirwa mu bikorwa ryaryo, ntabwo kiba kinyuranyije n’umuco, indangagaciro, n’indahiro y’igihugu cyacu gusa ahubwo kiba kinyuranyije n’amategeko.”

Aba bayobozi bongeyeho ko Perezida watowe Joe Biden, ku itariki 20 Mutarama azarahira akanaba umugaba mukuru w’ikirenga w’ingabo z’Amerika wa 47.

Ibaruwa kandi yihanganishije imiryango y’ababuze ababo mu myigaragambyo yabereye ku nteko, yahitanye abapolisi babiri ndetse n’abandi bantu batatu bari mu myigaragambyo.

General Mark Milley yavuze ko imyigaragambyo yabereye ku Nteko ari uguhonyora Itegeko Nshinga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .