Spotify ni urubuga ruzwiho gucuruza indirimbo n’ibiganiro mu buryo bw’amajwi, rwatangirijwe muri Suède ku wa 23 Mata 2006, ubusanzwe rufite abantu barukurikira miliyoni 144.

Mu masezerano mashya Harry na Meghan bagiranye na Spotify, biteganyijwe ko bazajya bayicishaho ibiganiro bakoze bo ubwabo cyangwa ibyo bagiranye n’abatumirwa batandukanye.

Mu kiganiro cyabo cya mbere bazakora, Meghan yavuze ko bazatumira abantu badasanzwe batandukanye bagasangiza abandi buhamya bwabo bw’ibyo banyuzemo muri uyu mwaka uri kurangira utaroroheye benshi.

Mu matangazo yamamaza iki gikorwa ari guca ku rubuga rwa Spotify, humvikana Harry avuga ko uyu mushinga icyo ugamije ari ukuzana isura nshya y’ibiganiro abantu batigeze bumva kandi bazibonamo.

BBC yanditse ko ikiganiro cya mbere cya Harry na Meghan kizasohoka mu bihe bya Noheli, byagereranyijwe n’ikiruhuko cyihariye.

Kuva uyu muryango wava i bwami mu Bwongereza ukajya gutura mu Mujyi wa California uyu mwaka, wagiye ukora ibikorwa bitandukanye birimo gushinga Sosiyete nshya itunganya amajwi yitwa Archewell Audio, ndetse banasinyanye amasezerano na Netflix yo gutunganya porogaramu zitandukanye ndetse no gukora filime z’uruhererekane.

Igikomangoma Harry na Meghan bagiye gutangira gukora ibiganiro bizanyura ku rubuga rwa Spotify

Igikomangoma Harry n’umugore we Meghan batangiye kugaragara mu bikorwa bitandukanye nyuma yo kureka inshingano bari bafite nk’abantu bakomeye mu Bwami bw'u Bwongereza