Igerageza ryatanze icyizere ku rundi rukingo rwa COVID-19, rwo rushobora kurinda umuntu kuri 95%

Yanditswe na Rabbi Malo Umucunguzi
Kuya 16 Ugushyingo 2020 saa 05:24
Yasuwe :
0 0

Urugamba rwo gushakisha urukingo rw’icyorezo cya COVID-19 rwongerewe imbaraga, nyuma y’uko ikigo Moderna gikora imiti cyo muri Leta Zunze Ubumwe za Amerika, gitangaje ibyavuye mu igerageza ry’ibanze byerekana ko urukingo rwacyo rutanga icyizere cyo kurinda umuntu kwandura ku kigero cya 94.5%.

Ni igerageza ryakorewe ku bantu 30.000 bo muri Leta Zunze Ubumwe za Amerika, barimo kimwe cya kabiri bahawe urukingo inshuro ebyiri, hagati harimo intera y’ibyumweru bine.

Mu byavuye mu igerageza byatangajwe kuri uyu wa Mbere, abantu 95 mu bakorerwagaho igerageza nibo banduye COVID-19, mu batewe rwa rukingo habonekamo batanu gusa banduye, 90 basigaye bari abo mu kindi cyiciro. Byahise bitanga icyizere ko urukingo rushobora kurinda umuntu kwandura ku gipimo cya 94.5%.

Uru ruganda rwatangaje ko ruteganya kwandikira Ikigo Gishinzwe Kugenzura Imiti n’Ibiribwa muri Leta Zunze Ubumwe za Amerika, US FDA, gisaba ko urukingo rwacyo rwakoreshwa mu buryo bwihutirwa, mu byumweru bike biri imbere.

Ibyavuye muri uru rukingo bije nyuma y’urundi ruheruka gutangazwa n’ibigo bya Pfizer yo muri Leta Zunze Ubumwe za Amerika na BioNTech yo mu Budage, byasanze nyuma y’igerageza, urukingo rwabo rushobora kurinda umuntu kwandura COVID-19 ku gipimo cya 90%.

Biteganywa ko urukingo rwa Moderna ariko rutazaboneka hanze ya Leta Zunze Ubumwe za Amerika kugeza mu mwaka utaha, kuko rugomba gutanga inkingo miliyoni 20 muri Amerika mbere y’uko uyu mwaka urangira, mu gihe ruteganya gukora hagati y’inkingo miliyoni 500 na miliyari imwe mu mwaka utaha.

Mu gihe mbere inkingo zatangwaga umuntu aterwa umuti urimo virus yapfuye iha umubiri amakuru ajyanye n’imiterere yayo kugira ngo wubake ubushobozi bwo kuyirwanya, urukingo rwa Moderna kimwe n’urwa Pfizer, zirimo akaremangingo kazwi nka Messenger RNA cyangwa mRNA, gaha amakuru umubiri ku miterere ya virus, ukiyubakamo ibiyigize, ukaniremamo ubushobozi bwo kuyirwanya.

Biteganywa ko urukingo rwa Moderna ruzakorwaho isuzumwa rya nyuma ubwo hazaba hamaze kuboneka abantu 151 banduriye Covid-19 mu igerageza, nk’umubare FDA yemeje ko waba uhagije ngo hafatwe icyemezo.

Umuyobozi Mukuru w’Ishami ry’Umuryango w’Abibumbye ryita ku Buzima, OMS, Dr Tedros Ghebreyesus, yatangaje ko nubwo harimo kuboneka icyizere ku nkingo za COVID-19, abantu bakwiye kurushaho kwirinda, kuko zizunganira ingamba zisanzweho mu kwirinda, aho kuzisimbura.

Yakomeje ati “Ikwirakwiza ry’ibanze ry’inkingo za COVID-19 rizibanda ku bakora mu nzego z’ubuzima, abantu bakuze, n’abandi bari mu byago byinshi byo kwandura.”

Ni ibikorwa yizera ko byagabanya umubare w’abantu bapfa, bigatuma inzego z’ubuzima zibasha guhangana n’ikwirakwira ry’iyi virus.

Urukingo rwa Moderna rukomeje gutanga icyizere cyo kuba rwarinda umuntu kwandura COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .