00:00:00 IGIHE NETWORK KN KINYARWANDA EN ENGLISH FR FRANCAIS

Igerageza ry’icyogajuru kizajyana abantu kuri Mars ryongeye kugenda nabi

Yanditswe na Ndahayo Emmanuel
Kuya 3 Gashyantare 2021 saa 01:15
Yasuwe :
0 0

Icyogajuru cy’Ikigo SpaceX cy’umuherwe Elon Musk, kuri ubu umaze kuba umukire wa mbere ku Isi n’umutungo urenga miliyari 188$, cyaturitse ubwo cyageragezaga kongera kugwa ku Isi kivuye mu kirere, mu igerageza rikomeje gukorwa mu gutegura ibyogajuru bya SpaceX bizajyana abantu ku mubumbe wa Mars no ku kwezi mu myaka iri imbere.

Musk ashinga SpaceX mu 2002, yavugaga ko ari ikigo kizafasha abantu gukora ingendo zo mu isanzure bakajya kuri Mars no ku Kwezi kandi bakagaruka byoroshye, bikazaba ingendo zihoraho ndetse bigateganywa ko abantu bashobora kuzajya gutura kuri Mars, ku buryo bizagera mu mpera z’iki kinyejana abarenga miliyoni bamaze kugerayo.

Kugira ngo ibi bigerweho, SpaceX yatangiye gukora umushinga witwa Starship, ugizwe no kubaka icyogajuru cya rutura gifite ubushobozi bwo guhagurutsa mu Isi ibintu bifite uburemere bwa toni 50 (kizaba kitwa Super Heavy). Uyu mushinga kandi uzubaka ikindi gikoresho cyihariye (cyagereranywa nk’indege) kiswe Starship, kizaba gifite ubushobozi bwo gutwara abantu 100 icya rimwe, kikabajyana mu cyerekezo bagiyemo, yaba ku Kwezi, kuri Mars ndetse n’ahandi hatandukanye.

Mu busanzwe, Starship izaba ifite ubushobozi bwo kwijyana aho yoherejwe hose, ariko ikazakenera kurenzwa ubutumburuke bw’Isi n’icyogajuru cya Super Heavy, kizayinjiza mu isanzure, aho izakomereza urugendo yonyine.

Kubera ko uyu ari umushinga ugamije kuzabyara inyungu, aho abantu bazajya bishyura amafaranga y’ingendo zijya kuri Mars no ku Kwezi, nk’uko ba mukerarugendo bishyura ingendo zijya gusura ibice runaka by’Isi, ibikoresho bigomba kuzakoreshwa muri izo ngendo, ari byo Super Heavy na Starship, bigomba kuzajya bikoreshwa inshuro zirenze imwe, kuko bigiye bikoreshwa inshuro imwe gusa, byahendesha urugendo cyane.

Magingo aya rero, ikirimo kuba ni igerageza ry’ibi bikoresho, aho bari kureba neza uburyo bizajya bigezwa mu isanzure ndetse n’uburyo bizajya byururutswa bigarutse ku Isi. Kururuka neza ni cyo kibazo gikomereye abahanga bari gukurikirana uyu mushinga muri SpaceX, ndetse no ku munsi w’ejo hashize hongeye kuba impanuka itewe n’iki kibazo, yakozwe n’icyogajuru cyari cyahawe izina rya SN9.

Iki cyogajuru cyari giteganyijwe kuzamuka kikagera muri kilometero 10 uvuye ku Isi, ndetse cyaragiye kirahagera, gitangira urugendo rukagaruka ku butaka ngo kigwe kuri cyicaro cyacyo kiri Majyepfo ya Leta ya Texas, ari na ho habera aya magerageza. Mu kumanuka, iki cyogajuru cyaje kugwa nabi kirasandara, kirema umurimo mwinshi ariko utigeze ukwirakwira hose.

Ni ku nshuro ya kabiri icyagajuru cya SpaceX gikoze impanuka muri ubu buryo mu mezi macye ashize, kuko byaherukaga mu Ukuboza umwaka ushize, ubwo ikindi cyogajuru na cyo cyakoraga impanuka kiri kugerageza kugaruka ku butaka.

Bivugwa ko kimwe mu bibazo bikigoye cyane ari uburyo bwo kugenzura umuvuduko w’ibyogajuru bimanuka kuko uba ari mwinshi bigatuma bisandara mu gihe cyo kugera ku butaka. Kubera ko Super Heavy ikirimo kubakwa, ubuyobozi bwa SpaceX buvuga ko amakuru bakura muri ibi bikorwa by’amagerageza arushaho gutuma batera intambwe nziza mu bikorwa byabo, hakaba n’abakeka ko aya makuru akoreshwa mu gukora icyogajuru cya Super Heavy nyirizina.

Elon Musk usanzwe akoresha cyane imbuga nkoranyambaga ntacyo aravuga kuri iri turika, ibintu bidasanzwe kuko uyu mugabo asanzwe azikoresha cyane, uretse ko yari aherutse kuvuga ko agiye kuba azivuyeho by’igihe gito.

John Insprucker warimo kuvuga uko iki gikorwa kiri kugenda, yavuze ko SpaceX "ikeneye kunoza uburyo [ibyogajuru byayo] bigwa ku butaka".

Yongeraho ati "kwinjira mu kirere byagenze neza nk’uko byari byagenze mu Ukuboza, ubu rero tubonye amakuru agaragaza uko twagenzura uko ibi bikorwa byo kugwa hasi".

SpaceX kandi yavuze ko ibikorwa by’amagerageza bizakomeza mu gihe gito kiri imbere.

Umushinga wa Starship byitezwe ko uzatangira neza gushyirwa mu bikorwa mu mwaka wa 2023, ubwo umukire w’Umuyapani, Yusaku Maezawa, kimwe n’abandi bantu bacye bakora ibishushanyo bazamuherekeza, bazazungurutsa ukwezi muri Starship, ubundi bakabona kugarurwa ku Isi. Uyu mugabo ngo yatanze akayabo mu rwego rwo gushyigikira uyu mushinga.

Ku rundi ruhande, mu gihe umushinga wose uzaba urangiye, bitezwe ko urugendo rumwe rushobora kuzajya kugura amafaranga ibihumbi 200$ (arenga miliyoni 198 Frw), icyakora ngo rukaba rushobora kuzamanuka rukagera ku bihumbi 100$.

Usibye Maezawa, Ikigo cy’Abanyamerika Gishinzwe gukurikirana amakuru y’ibibera mu isanzure, NASA, na cyo cyamaze gutangaza ko kizakorana na SpaceX, mu rwego rwo kugeza abashakashatsi bacyo hirya no hino mu isanzure mu gihe bizaba ngombwa.

Musk we avuga ko amafaranga azakomeza gushyigikira ibi bikorwa azava mu wundi mushinga witwa ’Starlink’ ugamije kohereza satellite mu isanzure zizafasha abatuye Isi gukoresha murandasi yihuta, aho iyo murandasi yanatangiye kugurishwa mu bihugu birimo Amerika n’u Bwongereza, ku giciro cya 99$ (arenga ibihumbi 98 Frw) ku kwezi, ku muntu wamaze kugura ibindi bikoresho bituma ashobora gukoresha iyo murandasi, na byo bizaba bigura 499$ (arenga ibihumbi 494 Frw).

Starlink irateganya kuzohereza satellite zirenga ibihumbi 42 mu isanzure kugira ngo iyi murandasi izabashe kugera ku Isi yose.

Musk ashimirwa cyane ku buryo ari umugabo utinyuka gukora imishinga y’ahazaza iba isa nk’idashoboka, kuko uretse Starlink na Starship, Musk anasanganywe uruganda rwa Tesla rukora imodoka zifashishwa amashanyarazi, rukaba ari rumwe mu nganda zadukanye iryo koranabuhanga ku Isi, ndetse izamuka ry’imigabane yarwo akaba ari yo yagize Musk umukire wa mbere ku Isi mu minsi ishize.

Uretse Musk, Jeff Bezos, umukire wa kabiri ku Isi, nawe yatangiye kwinjira cyane mu ishoramari ryo mu isanzure, aho nawe afite umushinga witwa ’Project Kuiper’ uzacuruza murandasi ukoresheje satellite. Ku munsi w’ejo kandi Bezos yeguye ku buyobozi bukuru bwa Amazon, Ikigo yashinze gikora ubucuruzi bwo kuri murandasi, aho bivugwa ko imwe mu mpamvu zikomeye yabikoze ari ukugira ngo abone umwanya uhagije wo gukurikirana indi mishinga ye, irimo cyane cyane uyu wa Project Kuiper nk’ahantu abona amahirwe akomeye y’ishoramari mu gihe kiri imbere, ariko nanone yamaze gusigwa cyane na Elon Musk bimaze kugaragara ko bazagirana ihangana rikomeye muri ibi bikorwa, ndetse iri hangana rikaba ryaramaze gutangira.

Iki cyogajuru cya SN9 cya Starship cyakoze impanuka kirimo kugerageza kuwa ku butaka kivuye mu isanzure

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .