00:00:00 IGIHE NETWORK KN KINYARWANDA EN ENGLISH FR FRANCAIS

Ibitero by’u Burusiya byashyize Kyiv mu icuraburindi

Yanditswe na IGIHE
Kuya 24 Ugushyingo 2022 saa 03:29
Yasuwe :

Abatuye Umurwa Mukuru wa Ukraine, Kyiv bari mu icuraburindi kubera ibura ry’amashanyarazi ryatewe n’ibisasu u Burusiya bwarashe ku bikorwa remezo by’iki gihugu birimo n’ibijyanye n’amashanyarazi.

Ku wa Gatatu tariki 23 Ugushyingo 2022, nibwo u Burusiya bwarashe ’misile’ 70 ku bice bitandukanye bya Ukraine birimo n’umurwa mukuru, Kyiv.

Ibi bitero byibasiye ibikorwa remezo birimo imiyoboro y’amazi n’amashanyarazi, aho kugeza ubu amakuru dukesha BBC avuga ko 70% by’abatuye Kyiv batarabasha kongera gucana.

Ibi bitero kandi byatumye inganda eshatu zatunganyaga amashanyarazi ava ku ngufu za ’nuclear’ zifunga imiryango.

Umuyobozi w’Umujyi wa Kyiv, Vitali Klitschko yavuze ko kugeza ubu bari gukora ibishoboka byose ngo abaturage bongere kubona umuriro gusa yemeza ko bitoroshye kuko hari n’ingomero zagezweho n’ingaruka z’ibi bitero by’u Burusiya.

Iki gikorwa cy’u Burusiya cyagize ingaruka zikomeye ku baturage ba Ukraine cyane ko cyasanze bari mu bihe by’ubukonje aho bamwe batari kubasha gukoresha ibyuma bishyushya mu nzu ndetse hari n’abatari kubasha guteka kuko bakoreshaga amashyiga y’umuriro w’amashanyarazi.

Bamwe mu baturage bahisemo kuguma aho bakorera no kuharara kuko ho nibura hari ’generators zishobora gutanga amashanyarazi.

Uretse ibura ry’amashanyarazi, Minisitiri w’Umutekano wa Ukraine, Denys Monastyrsky yatangaje ko ibi bitero by’u Burusiya byahitanye abantu 10.

Ibura ry'umuriro w'amashanyarazi muri Kyiv ryatumye bamwe bayoboka 'bougies'
Abagera kuri 70% by'abatuye Kyiv nta muriro w'amashanyarazi bafite
Abaturage bamwe bahisemo kuguma aho bakorera kuko ho nibura hari 'generators'
Imihanda yo mu Murwa Mukuru, Kyiv iri mu icuraburindi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .