Ibitaravuzwe ku bufatanye bwa Afurika n’u Bushinwa

Yanditswe na David Eugène Marshall
Kuya 7 Nzeri 2018 saa 06:01
Yasuwe :
0 0

Mu mpera z’icyumweru gishize Abakuru b’ibihugu na za Guverinoma 53 ba Afurika, basesekaye umusubirizo i Beijing mu Bushinwa, aho bitabiriye inama yiga ku bufatanye bw’impande zombi izwi nka FOCAC.

Amasezerano mu bijyanye na politiki, ibikorwa remezo, inganda n’ubuhinzi yarasinywe hagati y’impande zombi. Akiyongera ku bimaze gukorwa mu myaka 17 ubufatanye bw’u Bushinwa na Afurika bumaze.

Nubwo hari ubufatanye bw’impande zombi butangazwa, hari ubundi budatangazwa bushingiye ku kuba u Bushinwa bufite isoko rinini ry’intwaro mu bisirikare bya Leta n’imitwe irwanya ubutegetsi hirya no hino muri Afurika.

Urugero rwa hafi ni aho mu Kuboza 2017, itsinda ry’abakomando kabuhariwe ryaguwe gitumo hagati y’umupaka wa Cameroun na Guinée équatoriale, rifite umugambi wo guhirika ku butegetsi Teodoro Obiang Nguema Mbasogo uri mu bamaze igihe kinini ku butegetsi ku mugabane wa Afurika.

N’ubwo uwo mugambi wapfubye, byatahuwe ko imbunda nini n’iziciriritse ryari ryitwaje, zirimo za mitarayezi nini na RPG (Rocket Propellers Grenade) hamwe n’ibindi bikoresho bya gisirikare byari byaraguzwe mu Bushinwa.

Iki ni ikimenyetso kigaragaza ko mu byo umubano w’u Bushinwa na Afurika uzibandaho, hadashobora kuburamo ibijyanye n’ubucuruzi bw’intwaro ndetse n’ibindi bishingiye kuri serivisi z’umutekano z’abikorera ku giti cyabo.

U Bushinwa mu mugambi wo guhigika ibikomerezwa muri Afurika

Nk’uko bitangazwa n’Ikigo Mpuzamahanga gikora ubushakashatsi ku bijyanye n’ubucuruzi bw’intwaro gikorera Stockholm muri Suède, byagaragaye ko ubucuruzi bw’intwaro hagati ya Afurika n’u Bushinwa bwazamutseho 55% hagati ya 2013 na 2017, ugereranije n’izacuruzwaga hagati ya 2008-2012.

Ni mu gihe uruhare rw’u Bushinwa mu bucuruzi bw’intwaro na Afurika ruhagaze ku 17%, ubugereranije na Leta Zunze Ubumwe za Amerika iri kuri 11%.

Mu mpera za Kanama 2018, ikigo Exx Africa, cyasohoye icyegeranyo cyiswe ‘The Secret Chinese Arms Trade in the Horn of Africa’, cyagaragaje uburyo u Bushinwa bufite inyota yo guhigika ibihugu byahoze bikoloniza Afurika mu byerekeye ubucuruzi bw’intwaro kuri uyu mugabane.

Bushaka kandi kwigiza kure ibihugu byahoze ari iby’Abasoviyete, bisanganywe amasoko atari make.

Mu 2017 kandi u Bushinwa bwubatse Ikigo cya Gisirikare gikomeye muri Djibouti, bwabaye uburyo bworoshye bwo gukwirakwiza intwaro zabwo mu bihugu nka Sudan na Sudan y’Epfo, aho iki gihugu gifite inyungu zikomeye mu by’ubucukuzi bwa Peteroli.

Ibi kandi bukabikora bwirengagije ko ibi bihugu byombi byafatiwe ibihano mu by’ubucuruzi bwazo.

Bvugwa ko muri uyu mwaka wa 2018, Sudan yaguze imbunda zo mu bwoko bwa WS-1 302 mm, ndetse na misile zishwanyaguza za bulende zo mu bwoko bwa Red Arrow-8.

Nk’uko byemezwa n’impuguke za Loni, intwaro zakorewe mu Bushinwa zagaragaye kenshi muri Darfur, ndetse no mu maboko ya zimwe mu nyeshyamba zibarizwa muri ako gace.

Imwe mu masosiyete azobereye mu bucuruzi bw’intwaro y’abanya-Uganda izwi ku izina rya Bossay Logistics niyo yagaragajwe na Exx Africa, ko iza ku isonga ry’ubucuruzi bw’intwaro zikorerwa mu Bushinwa.

Igurisha cyane cyane ubw’imbunda zigezweho zo mu bwoko bwa Red Arrow-73D zisenya za bulende n’izindi zitandukanye.

Mu rwego rwo kuyobya uburari, abacuruzi b’intwaro b’Abashinwa banafasha Sudan zombi kugura intwaro mu bindi bihugu, nko kujijisha ngo zidakomeza kwigaragaza ahabera imirwano.

Mu nama y’Ihuriro rihuza Afurika n’u Bushinwa mu by’umutekano yabereye i Pékin mu mpera za Kamena 2018, hagaragayemo umujenerali mu ngabo za Sudan y’epfo Gabriel Jok Riak, ubusanzwe uri mu batemerewe kurenga umutaru, kubera ibihano bafatiwe n’umuryango mpuzamahanga.

Nk’uko Jeune Afrique ibitangaza, ibi byagaragaye nk’ikindi kimenyetso cy’imbaraga u Bushinwa, bwashyize mu bikorwa by’ubucuruzi buganisha ku ntwaro n’umutekano.

Byamenyekanye ko uyu musirikare uyobora igisirikare cya Sudan y’epfo mu byamujyanye harimo n’ubwo bucuruzi bw’imbunda, ndetse ko zimwe muri zo zamaze kugera muri icyo gihugu zicishijwe muri Djibouti.

Igisirikare cy’u Bushinwa mu isura y’abikorera muri Afurika

Ikigo cy’Abashinwa Mercator Institute for China, giherutse kugaragaza ko hari amasosiyete y’abikorera y’Abashinwa afite ibyicaro muri Pékin azobereye mu gucunga umutekano, yoherezwa muri Afurika afite inshingano zihariye zo gucunga umutekano w’inyungu z’icyo gihugu.

Aya masosiyete kandi ahora arikanuye, mu rwego rwo kuba yatabara byihuse Abashinwa bari mu kaga muri Afurika, kimwe no kubohoza abajya bafatwa bunyago bari mu bucuruzi butandukanye.

Urugero rwa hafi, ni aho imwe muri zo yitwa Beijing DeWe Security Services Limited Company, ikuriwe n’umuherwe Li Xiaopeng wigeze kuba icyamamare muri ruhago.

Iyi iherutse gutsindira ikiraka cyo gukura Abashinwa 300 ba Kompanyi China National Petroleum Corporation (CNPC), i Juba muri Nyakanga 2016, igihe intambara zabicaga bigacika muri Sudan y’epfo.

N’ubwo ayo masosiyete y’abashinwa agerageza gukwepa imikorere n’imikoranire n’andi akora ubushabitsi busa n’ubwo akora ariko mu rwego rwo kuyobya uburari, ntibikuraho ko amategeko y’Ubushinwa abuza bene ibyo bikorwa, gusa ngo iyo harimo inyungu zabwo zituruka mu mahanga icyo gihugu kiricecekera.

Ibi ngo bisobanuye ko u Bushinwa bwakoze iryo shoramari mu rwego rwo kubahiriza ihame ryo kutagaragaza igisirikare cyabwo mu mahanga, bugahitamo kugira ibikorwa bisa n’ibya gisirikare ariko byihindurije isura mu masosiyete yitwa ko yigenga mu gucunga umutekano mu mahanga, kandi ari nk’igisirikare mu kindi.

Ibihugu nk’u Burusiya, Israel, Afurika y’Epfo na Amerika nabyo ngo byaba byaramaze kwigana u Bushinwa bene aya mayeri yo gukoresha abashinzwe umutekano bitwa ko bikorera ku giti cyabo, mu nyungu zabyo zo mu mahanga ya kure.

Amasosiyete y’iby’umutekano mu Bushinwa ngo akaba ahabwa amabwiriza n’Ubuyobozi bw’Ishyaka PCC riri ku butegetsi, ari naryo ricungira hafi inyungu z’Ubushinwa ziri mu mahanga.

Ikigo Merics kivuga ko uburyo yigaragaza nk’amasosiyete y’abikorera ku giti cyabo mu by’umutekano, bishoboza u Bushinwa kuyakoresha mu manyanga, kandi muri ayo manyanga bugakuramo inyungu nyinshi bwifuza.

Abakuru b'ibihugu na za Guverinoma ba Afurika 53 baherutse mu nama i Beijing mu Bushinwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .