00:00:00 IGIHE NETWORK KN KINYARWANDA EN ENGLISH FR FRANCAIS

Ibintu 10 Dmitry Medvedev yaraguje umutwe ko bishobora kuba mu 2023

Yanditswe na IGIHE
Kuya 28 Ukuboza 2022 saa 11:09
Yasuwe :

Dmitry Medvedev wabaye Perezida w’u Burusiya, mu buryo bwo kuraguza umutwe yavuze ko mu mwaka wa 2023 hashobora kuba intambara hagati y’u Budage n’u Bufaransa, hakavuka n’imidugararo muri Leta Zunze ubumwe za Amerika, izarangira umuherwe Elon Musk abaye Perezida.

Ni ubutumwa burebure yanyujije ku mbuga nkoranyambaga ku munsi wakurikiye Noheli, ku wa 26 Ukuboza 2022.

Kuri urwo rutonde rw’ibintu 10, bibanzirizwa n’uko ibiciro bya peteroli bizatumbagira bikagera ku $150 ku kagunguru, ibya gaz bikagera ku $5.000 kuri metero kibe 1.000.

Ni ibiciro byaba bihanitse cyane, kuko ubu akagunguru ka peteroli kari ku $84, mu gihe ibiciro bya gaz kuri uyu wa kabiri byageze kuri $892 kuri metero kibe 1,000.

Ikindi yakomojeho ni uko u Bwongereza buzasubira mu Ubumwe bw’u Burayi (EU), umuryango bwivanyemo guhera ku wa 1 Gashyatare 2020.

Ingingo ya gatatu ni uko EU izasenyuka u Bwongereza bumaze kuyisubiramo; ndetse n’ifaranga rya Euro rikavaho. Mu bindi bishobora kuba, ngo Pologne na Hongrie bizafata ibice by’uburengerazuba bwa Ukraine;

Icya gatanu, Medvedev yavuze ko hazavuka icyo yise Fourth Reich kizaba kigizwe n’u Budage n‘ibihugu byishyize hamwe bya Pologne, Baltic states ( Estonia, Latvia, na Lithuania), Czechia, Slovakia na Repubulika ya Kiev.

Fourth Reich yaba ikurikiye Third Reich, inyito yahawe u Budage bwayoborwaga n’aba Nazi, hagati ya 1933 na 1945.

Medvedev yakomeje ati “Hazavuka intambara hagati y’u Bufaransa na Fourth Reich. U Burayi buzacikamo ibice.”

Ingingo ya karindwi ni uko Ireland y’Amajyaruguru iziyomora ku Bwongereza, ikihuza na Repubulika ya Ireland.

Iyi ngingo imaze iminsi igibwaho impaka, ndetse hari abasaba ko hakwiye gutegurwa kamarampaka abaturage bakagaragaza aho bahagaze, kuko benshi batishimiye kuva muri EU hamwe n’u Bwongereza.

Medvedev yakomeje ati “Hazavuka intambara muri Leta zunze ubumwe za Amerika, irangire California na Texas bibaye Leta zigenga. Texas na Mexico bizarema leta imwe. Elon Musk azatsinda amatora ya Perezida muri Leta nyinshi,”

Muri icyo gihe, ingingo ya cyenda ni uko amasoko manini n’ibikorwa by’imari bizava muri Leta zunze ubumwe za Amerika n’u Burayi, byimukire muri Aziya.

Ingingo ya nyuma ni uko uburyo busanzwe bukoreshwa mu gucunga ibijyanye n’imari ku isi (Bretton Woods) buzasenyuka, bigatuma Ikigega Mpuzamahanga cy’Imari (IMF) na Banki y’Isi bihirima.

Medvedev yakomeje ati “Euro n’Idolari bizahagarara gukoreshwa nk’amafaranga y’ubwizigame bw’ibihugu ku isi. Hazatangira gukoreshwa amafaranga yo mu ikoranabuhanga.”

Dmitry Medvedev w’imyaka 57 ni umuntu ukomeye mu Burusiya kuko yabaye Perezida w’icyo gihugu kuva mu 2008 kugeza mu 2012, Minisitiri w’Intebe ari Vladimir Putin.

Nyuma yaho, Putin yabaye perezida, Medvedev aba Minisitiri w’Intebe kuva mu 2012 kugeza mu 2020.

Kuva icyo gihe ni Umuyobozi wungirije w’Inama y’Igihugu ishinzwe umutekano, yungirije Putin, akanamwungiriza muri komisiyo iheruka gushyirwaho ishinzwe gukurikirana iby’inganda za gisirikare.

Medvedev ni ukuboko kw'iburyo kwa Perezida Putin

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .