00:00:00 IGIHE NETWORK KN KINYARWANDA EN ENGLISH FR FRANCAIS

Ibihugu bya Aziya birimo u Bushinwa byinjiye mu mwaka mushya witiriwe ’Urukwavu’ (Amafoto)

Yanditswe na Bukuru JC
Kuya 22 Mutarama 2023 saa 12:28
Yasuwe :

Ibihugu bitandukanye byo ku isi cyane cyane ibyo muri Aziya, kuri iki Cyumweru tariki 22 Mutarama byinjiye mu mwaka mushya ushingiye ku mboneko z’ukwezi, Lunar New Year, wiswe uw’urukwavu.

Ni umwaka bizihiza buri gihe nyuma y’iminsi ibindi bice byo ku isi byinjiye mu mwaka mushya, ukarangwa n’ibirori ndetse n’imyiteguro imara iminsi.

Uyu mwaka ushingiye kuri gakondo y’abatuye ibihugu byo muri Aziya nk’u Bushinwa, uhabwa izina bitewe n’inyamaswa igezweho mu ruhererekane rw’inyamaswa 12 zigomba gukurikirana . Uyu mwaka witiriwe urukwavu.

Ibirori mu bihugu nk’u Bushinwa, Indonesia, Philippines n’ahandi byatangiye muri iki cyumweru, bikazamara iminsi hafi irindwi.

Ni umwanya wo kongera guhura no kwishima ku miryango iba imaze umwaka idahura, bakishimira ibyo bagezeho, basaba n’imigisha ngo umwaka binjiyemo uzababere mwiza.

Nko mu Bushinwa ni umwaka udasanzwe kuko uje nyuma y’imyaka itatu benshi batabasha kwishimira umwaka mushya, kubera ingamba zari zarashyizweho zo kwirinda Covid-19.

Ibirori byo kuwizihiza bizamara iminsi 16 uhereye tariki 21 kugeza tariki 27 Mutarama 2023. Mu Bushinwa, iminsi irindwi izashira hari ibiruhuko hirya no hino mu gihugu.

Abashinwa bemera ko gutangira kwizihiza umwaka mushya byatangijwe n’Imana nkuru, Umwami w’Abami Jade ufatwa nk’Imana y’ijuru mu myemerere y’abatuye icyo gihugu.

Mu gihe cye yabaye umugenga w’izindi mana, ategeka isi n’ibiri mu nda yayo ndetse n’isanzure.

Hari inyamaswa 12 zemerewe kwitirirwa umwaka mu Bushinwa, nazo zifite inkomoko ku Mwami w’Abami Jade. Bivugwa ko umunsi umwe ubwo yari yizihije isabukuru y’amavuko, yatumijeho inyamaswa zose zo ku isi ngo zijye mu marushanwa yo kwiruka.

Inyamaswa 12 nizo zitabiriye amarushanwa, zirasiganwa, hanyuma umwanya zabonye akaba ari wo uzajya ukurikizwa zitirirwa umwaka runaka.

Imbeba ni yo yaje mbere, hakurikiraho inka, igisamagwe, urukwavu, dragon, inzoka, indogobe, intama, inkende, isake, imbwa, hasoza ingurube.

Aya ni amwe mu mafoto y’uburyo umwaka mushya w’urukwavu uri kwizihizwa hirya no hino ku Isi

Uyu mukobwa wo mu mujyi wa Huaibei mu Bushinwa yari ari kwitegura kwizihiza umwaka mushya akora umutsima uri mu ishusho y'urukwavu
Aha bari guterura bougies zo kwifashisha mu minsi mikuru, mu mujyi wa Bogor muri Indonesia
Muri Hong Kong bari bari kugura indabto ku bwinshi zo gutanga ku mwaka mushya
Umwana wo muri Yuncheng mu Bushinwa yambaye ingoferi iriho ishushyo y'urukwavu mu kwizihiza umwaka warwitiriwe
Imyiteguro yari irimbanyije kuri uyu wa Gatanu mu mujyi wa Zhengzhou mu Bushinwa, ibice byose byatatswe
Aha abana bari bari guha amafaranga umubyinnyi wambaye nk'urukwavu mu mbyino izwi nka Lion Dance muri Indonesia
Muri Chinatown muri Bangkok, umugore apfukamye asenga imbere ya bougies zaka
Uyu muntu wo muri Xian mu Bushinwa, ari gutanga ibyifuzo bye by'umwaka mushya ku rukata rwateguwe abantu bashyiraho ibyo bifuriza imiryango yabo
Mu mujyi wa Xiangxi Tujia and Miao mu Bushinwa, uyu mugore ari kumanika umutako yishimira kuba binjiye mu mwaka mushya
Uyu mugabo wo muri Panama yikoreye ingurube yokeje ajyanye gusangira n'umuryango we bishimira umwaka mushya
Muri Xian mu Bushinwa, byari ibyishimo mu ijoro ryo kuri uyu wa gatanu, umujyi wose wari warimbishijwe
Hirya no hino ku bizihiza uyu mwaka ushingira ku mboneko z'ukwezi, batatse ibikinisho biri mu ishusho y'urukwavu kuko ariyo nyamaswa yahariwe uyu mwaka
Uyu mubyinnyi wo muri Panama yahimbawe, ari nako ashimishia abahisi n'abagenzi binjiye mu mwaka mushya
Uyu mwana yariho aturitse ibishashi muri Wuhan, yishimira umwaka mushya
Abaturage bo muri Taipei muri Taiwan bahuriye mu rusengero, bashima Imana ko binjiye mu mwaka mushya amahoro
Aba bakobwa birimbishije bidasanzwe ngo barusheho gusa neza, mu mujyi wa Balki muri Indonesia
Mu bice bitandukanye by'u Bushinwa imitako yiganjemo ibara ritukura niyo yiganje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .