00:00:00 IGIHE NETWORK KN KINYARWANDA EN ENGLISH FR FRANCAIS

Ibihugu bicukura peteroli byemeranyije gukomeza kugabanya iyo bishyira ku isoko

Yanditswe na IGIHE
Kuya 4 Ukuboza 2022 saa 06:05
Yasuwe :

Umuryango w’Ibihugu bicukura Peteroli (OPEC) n’ibindi bifatanya byose bizwi nka OPEC+, kuri iki Cyumweru byemeranyije gukomeza intego yabyo yo kugabanya ingano ya peteroli bishyira ku isoko, ikavaho utugunguru miliyoni ebyiri ku munsi.

Ni icyemezo cyafatiwe mu Nama ya 34 ya OPEC n’ibindi bihugu bitabarizwa muri uyu muryango birimo u Burusiya, yabaye mu buryo bw’ikoranabuhanga hagamijwe gushyira ku murongo isoko ry’ibikomoka kuri peteroli ku Isi.

Ni inama yabaye mbere y’umunsi umwe gusa ngo icyemezo cy’Ubumwe bw’u Burayi (EU) gitangire gushyirwa mu bikorwa, aho peteroli icukurwa mu Burusiya itagomba kurenza $60 nk’igiciro ntarengwa, guhera ku wa Mbere.

OPEC+ yashimangiye ko icyemezo cyafashwe mu Ukwakira cyo kugabanya umusaruro wa peteroli ishyirwa ku isoko ho utugunguru miliyoni ebyiri ku munsi, "kiri mu murongo mwiza wo gusubiza mu buryo amasoko y’ibikomoka kuri peteroli ku Isi."

Kugabanya utugunguru miliyoni ebyiri ku ngano ya peteroli icuruzwa ku munsi - nibura 2% bya peteroli ikenerwa ku rwego rw’Isi - ni icyemezo cyafashwe mu Ukwakira, kirimo kubahirizwa guhera mu Ugushyingo uyu mwaka kugeza mu mpera z’umwaka wa 2023.

Biteganyijwe ko ba minisitiri b’ibi bihugu bashinzwe ingufu bazongera guhura ku wa 1 Gashyantare, mu gihe inama yabo yaguye izaba ku wa 3-4 Kamea 2023 hasuzumwa neza iki cyemezo.

OPEC+ yagabanyije hafi miliyoni 10 z’utugunguru ku musaruro wa peteroli icukurwa ku munsi muri Mata 2020, kubera ko ubukenerwe bwayo bwari bwamanutse cyane kubera icyorezo cya COVID-19.

Ubwo ubukungu bw’Isi bwagendaga bufunguka, ibi bihugu byatangiye kongera umusaruro wa peteroli icuruzwa guhera muri Mata 2021.

Icyemezo cyo kongera kugabanya ingano ya peteroli icuruzwa cyanenzwe n’ibihugu birimo Leta Zunze Ubumwe za Amerika, yavuze ko harimo kutareba kure kuko cyatuma ibiciro bikomeza kuzamuka, bikabangamira ibihugu bifite amikoro aciriritse.

Icyakora muri iyi minsi, ibiciro by’ibikomoka kuri peteroli byasaga n’ibimanuka bijyanye n’ubukungu bw’u Bushinwa muri iki gihe burimo kugenda gake.

Mu gihe u Burayi bwashyize ihurizo kuri peteroli igurwa mu Burusiya, birazana icyuho mu isoko kuko ibi bihugu byatumizagayo utugunguru miliyoni 2.4 twa peteroli idatuganyije, n’utugunguru miliyoni 1.4 tw’ibikomoka kuri peteroli bitandukanye, mbere y’intambara bwashoje kuri Ukraine ku wa 24 Gashyantare.

Gushyiraho igiciro ntarengwa birazana icyuho ku isoko, kuko bigoye kwemeza ko u Burusiya buzemera ko ubwo bucuruzi bukomeza.

Ku rundi ruhande, peteroli nyinshi y’u Burusiya buyigurisha mu Bushinwa n’u Buhinde, ibihugu byanze gucana umubano n’u Burusiya kubera intambara na Ukraine.

Uretse gushyiraho igiciro cya $60 ku kagunguru, biteganywa ko iki giciro kizajya gisuzumwa buri mezi abiri.

Intego ngo ni uko igiciro cya peteroli y’u Burusiya kizajya kiba hasi kuri 5%, ugereranyije n’igiciro cya peteroli ku rwego mpuzamahanga.

Ni ibyemezo bifatwa nk’ibigamije guca intege u Burusiya binyuze mu kugabanya amafaranga bwinjiza mu bucuruzi bwa peteroli.

Ibikomoka kuri peteroli ni kimwe mu bicuruzwa byinjiriza u Burusiya akayabo. Imibare igaragaza ko kuva intambara yo muri Ukraine yatangira, iki gihugu kimaze kugurisha ibikomoka kuri peteroli bifite agaciro ka miliyari $84.5.

Ibihugu bicukura peteroli byemeranyije gukomeza kugabanya iyo bishyira ku isoko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .