Izi sosiyete zombi zabanje kwemera gukorana ku bijyanye no gukora imodoka zikoresha amashanyarazi muri Werurwe uyu mwaka, muri Kanama iyi gahunda ifata umurego aho bemeranyije gufatanya mu by’ikoranabuhanga harimo n’ibijyanye no gukora amabateri bafatanyije na Mitsubishi Motors.

N’ubwo ibyo biganiro byabaye, nta sosiyete n’imwe irabyemeza ku mugaragaro. Ibitangazamakuru byo mu Buyapani nka Nikkei na TBS byo bigaragaza ko iby’uku guhuza imbaraga bishobora kuzatangazwa mu cyumweru gitaha.

Ni cyemezo gishaka gufatwa mu gihe inganda z’imodoka ku Isi zihanganye n’umuvuduko w’abakora imodoka zikoresha amashanyarazi mu Bushinwa, aho kuri ubu bihariye hafi 70% by’imodoka zose zigurishwa ku Isi yose muri uru rwego.

Abasesenguzi bagaragaje ko ukwihuza kw’izi sosiyete zombi gushobora kugongwa n’ibibazo bitandukanye birimo ibishingiye kuri politiki, impungenge ku igabanyuka ry’abakozi ndetse hakazamo n’ingingo y’ubufatanye busanzwe hagati ya Nissan na Renault nayo igomba guhabwa umurongo mu gihe ibyufuzwa byaba byemejwe.

Nyuma y’uko aya makuru atangiye gutangazwa mu bitangazamakuru binyuranye, agaciro k’imigabane ya Nissan ku isoko ry’imari kazamutseho 20%, mu gihe ak’iya Honda kagabanutseho 2% bivugwa ko bishobora kuba byaratewe n’impungenge z’abashoramari ku hazaza hayo.

Bivugwa ko mu cyumweru gitaha ari bwo Sosiyete z’imodoka zo mu Buyapani, Honda na Nissan, zizatangaza ko zihuje ku mugaragaro