Hatahuwe ko abakozi ba Boeing bahererekanyije ubutumwa ku bibazo by’indege zayo mu 2016

Yanditswe na Habimana James
Kuya 19 Ukwakira 2019 saa 11:57
Yasuwe :
0 0

Ku wa Gatanu w’iki cyumweru, hashyizwe hanze amakuru yuko abakozi b’Ikigo cya Boeing, mu 2016 bagiye bahererekanya ubutumwa bugufi, bugaragaza ikibazo cya tekiniki cyari mu ndege 737 Max ubwo zahabwaga ibyangombwa byo gutwara abagenzi.

Muri Werurwe 2019, indege ya Boeing yo mu bwoko bwa 737 Max ya Sosiyete ya Ethiopian Airlines yakoze impanuka ihitana abantu 157 bari bayirimo.

Iyo mpanuka yakurikiye indi ya sosiyete ya Lion Air yo muri Indonesia yabaye mu Ukwakira umwaka ushize igahitana abantu 189.

Izo mpanuka byatangajwe ko zatewe na porogaramu z’ubwoko bw’indege zifasha abazitwaye kugenzura ibijyanye no kuzamuka cyane mu kirere.

Ubu noneho inyandiko zatanzwe na Boeing ikazishyikiriza abacamanza, hari aho umupilote w’iki kigo yigeze kuvuga ko yabonye ikibazo kitizewe cyari kizirimo ubwo zakorwagamo igenzura.

Uyu mupilote hari aho yagize ati “Nabeshye abakoraga igenzura mu buryo ntazi neza.”

Ikigo gishinzwe kugenzura iby’Indege muri Leta Zunze Ubumwe za Amerika (FAA) cyavuze ko izi nyandiko ziteye ikibazo, ndetse gitekegeka Boeing guhita itanga ibisobanuro ku mpamvu yatinze kuzitanga.

BBC yatangaje ko Umuyobozi Mukuru wa Boeing, Dennis Muilenburg, yaba ari hafi gutanga ubuhamya kuri iki kibazo.

Boeing yatangaje ko irimo gufatanya kugira ngo hakorwe iperereza kuri izi ndege za 737 Max, zamaze guhagarikwa kuva muri Werurwe uyu mwaka.

Boeing yavuze ko “Tuzakomeza gukurikiza amabwiriza ya FAA n’ibindi bigo mpuzamahanga, mu gihe dukomeje gukorana ngo ubwoko bw’izi ndege buzongere gukoreshwa.”

Abasesenguzi banenze Boeing na FFA kuba batarakoze ibikwiye ngo bagenzure ahagombaga kuvuka ikibazo.

Boeing yo yatangaje ko itigeze ishaka guhishira ubutumwa bwagaragaje iki kibazo. Yavuze ko “Uyu mupilote ubu ntagikora muri iki kigo.”

Nyamara umwe mu bakozi ba Boeing, mu gusubiza ubu butumwa bw’iki kigo, yanditse ati “Ntabwo yabeshyaga (Umupilote), nta numwe watubwiye ko hari ikibazo.”

Nyuma y’aho ubu butumwa bugiye hanze, imigabane ya Boeing ingana na 5% yamaze guta agaciro.

Abakora igenzura kuri izi mpanuka zombi bakomeje gushakisha ku kuma kitwa MCAS (Manoeuvring Characteristics Augmentation System), kakozwe mu rwego rwo gutuma indege ihaguruka neza.

Abahanga bavuga ko izi mpanuka zatewe n’uko aka kuma katakoraga neza, bikaba byaratumye abapilote bombi bananirwa kugenzura indege, aya makosa yose akaba ashyirwa kuri Boeing.

Indege zo mu bwoko bwa Boeing 737 MAX ni ubwoko bushya bwa Boeing zifite moteri ebyiri. Zirimo MAX7, MAX8, MAX9 na MAX10. Zishobora gutwara hagati y’abantu 138 na 204, zikaba zagenda ingendo ngufi n’ingendo ndende.

Boeing yari imaze kugurisha indege 350 naho ibigo birenga 60 hirya no hino ku Isi byari bimaze gutumiza izi ndege 5000.

Abakozi ba Boeing baba baragiye bahererekanya ubutumwa buvuga ku bibazo by'izi ndege zakoze impanuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza