Hahishuwe ko Boeing yasabwe guhagarika gukora indege za Boeing 737 MAX ikabyanga

Yanditswe na Evariste Nsengimana
Kuya 12 Ukuboza 2019 saa 01:29
Yasuwe :
0 0

Ubusesenguzi bwakozwe na Guverinoma ya Amerika ku bwoko bw’indege za Sosiyete ya Boeing za 737 MAX nyuma y’impanuka zakoze, bwagaragaje ko mu gihe kiri imbere zashoboraga kongera gukora izindi ariko ntiyigeze izihagarika kugeza yongeye kuba.

Izo mpanuka uko ari ebyiri zirimo iya Lion Air Jet yo muri Indonesia yakoreye impanuka mu Nyanja ya Java mu Ukwakira 2018 na Ethiopian Airlines yayikoreye Addis Abba muri Werurwe 2019 zahitanye ubuzima bw’abasaga 346.

Raporo yatangajwe kuri uyu wa Gatatu n’Ishyirahamwe ry’Ubwikorezi mu by’Indege muri Amerika (FAA), yakozwe mu Ukwakira 2018 nyuma y’iminsi mike iya mbere ikoze impanuka, yagaragaje ko indege zo mu bwoko bwa MAX bushobora kuzakora izindi mpanuka nibura 15.

Umuyobozi wa FAA, Stephen Dickson yavuze ko ashingiye kuri iyo raporo n’andi makuru yari asanzwe azi, yari kuba yaragize icyo akora ku mwanzuro wo guhagarika Boeing 737 MAX iyo utaza gufatwa ataragirwa umuyobozi muri iryo shyirahamwe.

Iyi raporo yasohowe bwa mbere na Wall Street Journal. Boeing yavuze ko isesengura ryakozwe ryayisabaga kuburira no guha abapilote bayo amabwiriza abafasha gukomeza gutwara indege kugeza igihe iza MAX zihinduriwe software za MCAS [porogaramu ituma indege za Boeing 737 Max 8 ziyobora].

Abapilote bamwe bavuze ko amabwiriza bahawe ari ukwiga imikorere y’iyo porogaramu, ari nayo iperereza ryagaragaje ko yagize ikibazo igateza impanuka.
Gusa Dickson ntiyavuze niba umwanzuro wo guhagarika Boeing wagumaho cyangwa yafatirwa ibihano kuko itubahirijwe ibyo yasabwe bigatuma yongera gukora impanuka.

Uwahoze ari umukozi muri Boeing, Ed Pierson, wanakoze ku ikoranabuhanga riyobora indege zo mu bwoko bwa 737 MAX, yavuze ko yagiriye inama umuyobozi wayo guhagarika umuyoboro zakorerwagaho kubera ibibazo wari ufite ariko ntahe agaciro ibyo yavugaga.

Yavuze ko igitutu abakozi bashyirwagaho basabwa gukora indege nyinshi no gukora amasaha menshi byatumaga bazikorana amakosa akomeye.

Ati “Inshuro nyinshi nandikiye abayobozi ba Boeing mbaburira, cyane cyane mbere y’uko Lion Air na Ethiopian Airlines ikora impanuka ku makosa akomeye yakorwaga mu ndege bitewe n’uburyo imikorere yari imeza mu ruganda. Ibyo byose ntibyahawe agaciro.”

Yasobanuye ko kugira abenjeniyeri n’abapilote beza bidahagije kugira umusaruro mwiza mu gihe abakozi batabonaga umwanya wo kuruhuka no kwita ku miryango yabo, ibyo bigatuma bakora ibintu bitanoze.

Ni ubwa mbere uyu mugabo atanze ubu buhamya mu ruhame ariko mu Ukwakira yabuhaye umuyobozi wa Boeing, Dennis Muilenburg. Avuga ko icyo gihe yatangiye kubigenzura bari kumwe ndetse hafatwa ingamba zitandukanye.

Indege zo mu bwoko bwa Boeing 737 MAX ni ubwoko bushya bwa Boeing zifite moteri ebyiri. Zirimo MAX7, MAX8, MAX9 na MAX10. Zishobora gutwara hagati y’abantu 138 na 204, zikaba zagenda ingendo ngufi n’indende.

Hahishuwe ko Boeing yasabwe guhagarika gukora indege za Boeing 737 MAX ikabyanga mbere yo gukora impanuka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza