00:00:00 IGIHE NETWORK KN KINYARWANDA EN ENGLISH FR FRANCAIS

Hagiye gukorwa iperereza ku nyandiko z’amabanga ya Leta Perezida Biden yandagaje

Yanditswe na Umwali Zhuri
Kuya 13 Mutarama 2023 saa 08:24
Yasuwe :

Ubushinjacyaha bwa Leta Zunze Ubumwe za Amerika bwagennye Robert Hur nk’umushinjacyaha wihariye ugomba gukora iperereza ku nyandiko za Leta zo mu gihe Joe Biden yari akiri Visi Perezida, zimaze iminsi ziboneka ahantu hatandukanye zandagaye.

Ni inyandiko zirimo amabanga ya Leta yo ku butegetesi bwa Perezida Barrack Obama, by’umwihariko izo mu biro bya Visi Perezida, icyo gihe wari Joe Biden.

Mu Ugushyingo umwaka ushize nibwo izo nyandiko za mbere zavumbuwe n’abanyamategeko ba Biden, bazisanga mu biro i Washington aho Biden yakoreraga ataraba Perezida, mu muryango utegamiye kuri Leta.

Izindi nyandiko zavumbuwe tariki 20 Ukuboza 2022 mu igaraje iri mu rugo rwa Biden muri Leta ya Delaware, bazisaganga zinyanyagiye.

Byabanje gucecekwa n’abanyamategeko ba Biden kugira ngo bitabangamira ishyaka rye mu matora y’abagize Inteko Ishinga Amategeko aherutse, biza kugera mu itangazamakuru ari naryo ryabisakaje.

Izo nyandiko zasanzwe aho zitagomba kuba, ntabwo ibizukubiyemo byavuzwe, icyakora abazibonye bemeza ko ari amabanga akomeye ya Leta atari akwiriye kuba ari ku gasozi.

Ubusanzwe inyandiko z’abayobozi bakuru muri Leta Zunze Ubumwe za Amerika iyo bavuye ku buyobozi zibikwa ahantu hizewe harindiwe umutekano n’inzego za Leta cyangwa zikabikwa mu rwego rushinzwe ishyinguranyandiko.

Kunyanyagiza inyandiko zirimo amabanga akomeye ya Leta bigakorwa ku bushake, ni icyaha gikomeye cyane kuko bishobora gushyira umutekano w’igihugu n’abagituye mu kaga.

Umushinjacyaha Robert Hur washyizweho, yahawe inshingano zo gukora iperereza akamenya niba hari umuntu ku giti cye cyangwa se ikindi kigo cyagize uruhare rugaragara mu gushyira hanze izo nyandiko, binyuranye n’amategeko.

Inyandiko za mbere zabonetse hashize amezi atatu urwego rushinzwe iperereza muri Amerika, FBI rutangiye iperereza n’isaka mu rugo rwa Donald Trump wahoze ari Perezida ruherereye muri Florida, aho ashinjwa kuhabika ibihumbi by’inyandiko za Leta, kandi bitemewe.

Ibiro bya Perezida Biden byatangaje ko batunguwe n’izo nyandiko kuko ngo atari azi ko zinyanyagiye gutyo. Itsinda ry’abanyamategeko ba Biden rikimara kubona izo nyandiko, ngo nibo bahise babigeza mu butabera ngo bikurikiranwe.

Biden yashyiriweho umushinjacyaha wihariye ukora iperereza ku nyandiko z'amabanga ya Leta zandagajwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .