Giscard d’Estaing wayoboye u Bufaransa yishwe na Coronavirus

Yanditswe na IGIHE
Kuya 3 Ukuboza 2020 saa 04:57
Yasuwe :
0 0

Valéry Giscard d’Estaing wahoze ari Perezida w’u Bufaransa yapfuye afite imyaka 94 azize icyorezo cya Coronavirus.

Giscard wabaye Perezida w’u Bufaransa guhera mu 1974 kugeza mu 1971 yari amaze iminsi arwariye mu Mujyi wa Tours kubera ibibazo by’indwara z’ubuhumekero byafashe indi ntera kubera Coronavirus. Yasezerewe mu bitaro hagati mu kwezi k’Ugushyingo.

Umuryango yashinze watangaje ko Giscard yaguye iwe mu rugo azize coronavirus. Bagize bati “Ubuzima bwe bwari bumeze nabi kubera ingaruka za Covid-19.”

Bakomeje batangaza ko kubera ibyifuzo yatanze mbere yo gupfa, ikiriyo cye kizakorwa mu buryo bwihariye ku mabwiriza y’umuryango.

Giscard yaherukaga kugaragara mu ruhame umwaka ushize tariki 30 Nzeri ubwo yari yitabiriye ikiriyo cya mugenzi we nawe wayoboye u Bufaransa, Jacques Chirac wanamubereye Minisitiri w’Intebe.

Yibukirwa ku ngamba yagiye azana ku buyobozi bwe zigamije kuvugurura imiyoborere n’amategeko y’u Bufaransa, nk’aho hagiyeho itegeko rya gatanya yumvikanyweho, gushyiraho itegeko ryemera gukuramo inda no kugabanya imyaka yo gutora ikaba 18.

Yagiye ku butegetsi afite imyaka 48 u Bufaransa bumaze igihe buyoborwa na General de Gaulle, azana gahunda yo guteza imbere ubukungu n’imibereho myiza. Nubwo yaje asa nk’ukunzwe, ntabwo yabashije gutorerwa manda ya kabiri kuko yatsinzwe na François Mitterrand.

Giscard niwe wagize igitekerezo bwa mbere cyo guhuriza hamwe abayobozi b’ibihugu bikize mu 1975, ari naho haje kuvamo igitekerezo cya G7, ibihugu birindwi bikize ku isi, aho kuri ubu buri mwaka haba inama y’abayobozi babyo.

Yavutse mu muryango wishoboye ndetse yiga mu mashuri meza mu Bufaransa nko mu ryitwa Ecole Polytechnique. Ubwo yari afite imyaka 18 yinjiye mu ngabo z’u Bufaransa ndetse arwana mu ntambara ya kabiri y’isi.

Yatangiye ubuzima bwa politiki mu 1959 ubwo yagirwaga Minisitiri w’imari.

Muri uyu mwaka, Giscard yashinjwe ibyaha by’ihohotera rishingiye ku gitsina byatanzwe n’umunyamakuru wo mu Budage Ann-Kathrin Stracke. Uwo munyamakuru yatangaje ko ubwo bagiranaga ikiganiro mu 2018 yamukorakoye, icyakora Giscard n’abamwunganira mu mategeko barabihakanye.

Umuryango wa Giscard d’Estaing watangaje ko yishwe na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .