Ghana igiye gusubukura ingendo z’indege, Amerika n’u Buhinde bikomeje kugarizwa na Covid-19, muri Zimbabwe inzovu 12 zapfuye amarabira... Amakuru yo hanze y’u Rwanda

Yanditswe na Iradukunda Serge
Kuya 31 Kanama 2020 saa 11:38
Yasuwe :
0 0

Nyuma y’igihe Ghana ihagaritse ingendo z’indege kubera icyorezo cya Coronavirus, Perezida w’iki gihugu yatangaje ko zigiye kongera gusubukurwa.

Perezida Akufo-Addo yavuze ko ingendo z’indege zizongera gusubukurwa ku wa 1 Nzeri nyuma y’uko umubare w’abakirwaye muri iki gihugu ugenda ugabanuka.

Kuva icyorezo cya Covid-19 cyagera muri Ghana muri Werurwe iki gihugu cyahise gifata umwanzuro wo guhagarika ingendo zo mu mazi ku butaka n’izo mu kirere ziva cyangwa zinjira muri iki gihugu.

Ubwo yavugaga ko ingendo z’indege zigiye kongera gufungurwa, Perezida wa Ghana yongeyeho ko umugenzi uzajya muri iki gihugu agomba kuzajya yerekana icyangombwa cya muganga cyemeza ko nta Covid-19.

Abagenzi bazajya bagera muri iki gihugu bazajya bongera kandi bapimwe ku buryo mu minota 30 bazajya bahabwa ibisubizo byabo ariko bakiyishyurira ikiguzi.

Mbere y’uko Ghana ifunga ingendo z’indege ikibuga Mpuzamahanga cy’indege cya Kotoka cyakiraga abagenzi bagera ku bihumbi 24.500 buri cyumweru.

Ghana yavuze ko ku wa 1 Nzeri izongera gusubukura ingendo z'indege

Andi makuru...

Mu Buhinde na Amerika abandura Covid-19 bakomeje kwiyongera

Umubare w’abantu bandura icyorezo cya Covid-19 mu Buhinde no muri Leta Zunze Ubumwe za Amerika bakomeje kwiyongera umusubirizo, dore ko muri Miliyoni zirenga 25 z’abamaze kwandura iki cyorezo ku Isi hose ibi bihugu byihariyemo abarenga miliyoni icyenda.

Muri iki gitondo cyo ku wa 31 Kanama Johns-Hopkins University yatangaje ko umubare w’abanduye Covid-19 muri Leta Zunze Ubumwe za Amerika umaze kurenga Miliyoni esheshatu. Umubare w’abamaze guhitanwa n’iki cyorezo muri Amerika nawo umaze kurenga ibihumbi 183.

Kugeza ubu Leta Zunze Ubumwe z’Amerika nicyo gihugu gifite umubare munini w’abantu banduye Covid-19 aho biganje muri Leta nka California, Texas, Florida, New York na Georgia.

Mu Buhinde ho, mu gihe cy’iminsi ibiri abanduye Covid-19 barenze ibihumbi 150,ibi bibaye nyuma y’uko ku wa 30 Kanama handuye abagera ku bihumbi 78,512 baje basanga ibihumbi 78,761 byari byanduye ku munsi wabanje.

Ibi byatumye umubare wose w’abamaze kwandura iki cyorezo urenga miliyoni 3.6 mu gihe abo imaze guhitana barenga ibihumbi 64.

Mu bindi bihugu byugarijwe cyane na Covid-19 harimo Brazil imaze gupfusha abarenga ibihumbi 121, mu gihe abarenga miliyoni eshatu banduye na Afurika y’Epfo imaze gupfusha abarenga ibihumbi 14 mu gihe abanduye bo bagera ku bihumbi 600.

Umubare w'abandura Covid-19 mu Buhinde no muri Leta Zunze Ubumwe z'Amerika ukomeje kwiyongera

Zimbabwe: Inzovu 12 zapfuye mu buryo bw’amarabira

Ubuyobozi bwa Pariki muri Zimbabwe bwatangije iperereza k’urupfu rw’inzovu 12 zaguye muri Pariki y’igihugu ya Hwange.

Ubuyobozi bwavuze ko mu mpamvu bakeka kuba zihishe inyuma y’urupfu rw’izi nzovu hatarimo ba rushimusi kuko izi nzovu bazisanganye amahembe yazo mu gihe ba rushimusi ariyo baba bashaka.

Ubu buyobozi bwa Pariki bwafashe amaraso y’izi nzovu kugira ngo ajyanywe muri Laboratwari hapimwe icyaba cyazishe.

Pariki ya Hwange yaguyemo izi nzovu iri hafi n’umupaka utandukanya Zimbabwe na Botswana nayo iherutse gupfusha inzovu zirenga 360.

Muri Zimbabwe inzovu 12 zasanzwe zapfuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .