00:00:00 IGIHE NETWORK KN KINYARWANDA EN ENGLISH FR FRANCAIS

Gereza ya Guantanamo igiye kurekura Umunya-Kenya n’Umunya-Somalia bari bayimazemo imyaka 15

Yanditswe na Muhonzire Sylvine
Kuya 13 Mutarama 2022 saa 02:57
Yasuwe :

Leta Zunze Ubumwe za Amerika igiye gufungura imfungwa eshanu zirimo Umunya-Kenya n’Umunya-Somalia bari bamaze imyaka irenga 15 bafungiye muri Gereza ya Guantanamo muri Cuba nyuma yo gusanga nta cyaha bari bakurikiranyweho.

CNN dukesha iyi nkuru yatangaje ko Ikigo gishinzwe kugenzura ko nta mfungwa ziri muri iyi gereza zifungiye ubusa, Periodic Review Board, ari cyo cyagennye ko Guled Hassan Duran wo muri Somalia na Mohammed Abdul Malik Bajabu wo muri Kenya barekurwa.

Duran yafashwe n’Igisirikare cya Amerika mu 2004 yoherezwa i Guantanamo mu 2006 ari imfungwa nkuru, aho yashinjwaga kuba umwe mu bagize Umutwe w’Iterabwoba ugendera ku matwara ya Islam wa Al-Qaeda wajujubije igihugu akomokamo.

Umunyamategeko wamuburaniraga, Mark Maher, yatangaje ko Duran yari amaze imyaka 15 muri gereza nta dosiye imushinja ndetse ataranagezwa imbere y’urukiko ngo aburanishwe.

Bajabu we yafunzwe mu 2007 ashinjwa gufasha abayobozi ba Al-Qaeda muri Afurika y’Iburasirazuba no kuba yaragize uruhare mu itegurwa ry’igitero cy’iterabwoba uyu mutwe wagabye i Mombasa muri Kenya mu 2002.

Icyemezo cyo kumufungura cyafashwe nyuma yo kubona ko igihe yabaga muri uyu mutwe atari umuntu ukomeye kuko nta myitozo ihagije yari afite ndetse nta n’ubumenyi mu bijyanye n’ubuyobozi yagiraga.

Abandi batatu bafunguwe ni abagabo bakomoka muri Yemen na bo bashinjwaga kuba muri Al-Qaeda aho babiri bafunzwe mu 2002 ,undi afungwa mu 2003. Bategerejwe gufungurwa nyuma yo guhanagurwaho ibyaha na PRB.

Aba bagabo batanu bazafungurwa nyuma yo gutegura neza igikorwa cyo kubohereza mu bihugu bazaturamo yaba ibyo bavukamo cyangwa ibindi bizemera kubakira.

Guantanamo ni gereza y’igisirikare cya Amerika izwiho gutoteza imfungwa, kuzica urubozo no guhonyora uburenganzira bwazo.

Yatangijwe mu 2002 n’ubuyobozi bwa Perezida George W. Bush nyuma y’igitero Al-Qaeda yagabye kuri Amerika mu 2001, aho yafungirwagamo abari bafitanye isano n’uyu mutwe.

Ku buyobozi bwa Barack Obama ni bwo hatangijwe Periodic Review Board (PRB) ishinzwe kugenzura ko nta bantu barengana bayifungiwemo ndetse abarenga 38 bamaze guhanagurwaho ibyaho n’iki kigo.

Duran (ibumoso) na Bajabu bari mu bantu batanu bazafungurwa bakava i Guantanamo nyuma yo guhanagurwaho ibyaha na PRB

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .