00:00:00 IGIHE NETWORK KN KINYARWANDA EN ENGLISH FR FRANCAIS

Finlande igiye gusaba kujya muri NATO: Ibigezweho mu ntambara y’u Burusiya na Ukraine

Yanditswe na IGIHE
Kuya 15 May 2022 saa 02:24
Yasuwe :

Intambara y’u Burusiya na Ukraine yinjiye mu munsi wa 81, ndetse ibihugu byo mu Burayi na Leta zunze ubumwe za Amerika bikomeje kohereza intwaro nyinshi muri Ukraine, mu gihe inzego z’ubutasi zabo zivuga ko ibitero bya Moscow bimaze gucika intege.

 Finlande igiye gusaba kujya muri NATO
 Perezida Putin yise amakosa icyemezo cya Finlande
 Amerika na Ukraine bigiye gufatanya kugeza ibiribwa muri Afurika
 Turikiya ikomeje kwikoma Suède na Finlande

Finlande yemeje ko igiye gusaba kujya muri NATO

Perezida wa Finlande, Sauli Niinistö, ari kumwe na Minisitiri w’Intebe, Sanna Marin, batangaje ko igihugu cyabo kigiye gusaba kwinjira mu ihuriro rya gisirikare rya NATO, nyuma y’intambara u Burusiya bwatangije kuri Ukraine buyihora gushaka kujya muri uwo muryango.

Iki cyemezo gifite byinshi kivuze, kuko Finlande n’u Burusiya bisangiye umupaka ureshya na kilometero 1,340.

U Burusiya burwanya ko ibihugu byegeranye byajya muri NATO, bikaba byatuma ibihugu bikomeye byo mu Burayi na Leta zunze ubumwe za Amerika bishinga intwaro mu marembo yabwo.

Perezida wa Finlande, Sauli Niinistö, ari kumwe na Minisitiri w’Intebe, Sanna Marin, mu kiganiro n'itangazamakuru kuri iki Cyumweru

Ni icyemezo u Burusiya buvuga ko kibangamiye umutekano wabwo, ku buryo ibihugu biri hagati y’u Burusiya n’imipaka isanzwe ya NATO, bikwiye kuguma bidafite uruhande bibogamiyeho.

Biteganyijwe ko Inteko ishinga amategeko ya Finlande izemeza iki cyemezo mu buryo bwemewe n’amategeko, maze ubusabe bugashyikirizwa ubunyamabanga bwa NATO i Bruxelles.

Perezida Putin yabyise amakosa

Perezida w’u Burusiya Vladmir Putin kuri uyu wa Gatandatu yabwiye Perezida wa Finlande ko kujya muri NATO byaba ari "ikosa."

U Burusiya buheruka no guhagarika amashanyarazi bwoherezaga muri Finlande, kubera uwo mugambi ifite.

Ibiro bya Perezida w’u Burusiya, Kremlin, kuri uyu wa Gatandatu byasohoye itangazo biti "Putin yashimangiye ko gushyira iherezo kuri politiki imaze igihe no kutagira aho babogamira mu bya gisirikare byaba ari ikosa, cyane ko nta nkeke ziri ku mutekano wa Finlande,"

Rikomeza riti "Izo mpinduka mu cyerekezo cya politiki bishobora kugira ingaruka mbi ku mubano w’u Burusiya na Finlande wubatswe mu myaka myinshi ishize, hagamije ubuturanyi bwiza n’ubutwererane hagati y’ibihugu byombi,"

U Burusiya na Finlande bisangiye umupaka muremure cyane

Intwaro zikomeje kwisuka muri Ukraine

Minisitiri w’Ububanyi n’amahanga wa Ukraine, Dmytro Kuleba, yatangaje ko nyuma y’inama yagiranye n’abayobozi barimo mugenzi we wa Leta zunze Ubumwe za Amerika, Anthony Blinken mu Budage, hari intwaro nyinshi n’izindi nkunga biri mu nzira.

Yagize ati "Izindi ntwaro n’inkunga biri mu nzira biza muri Ukraine. Twemeranyije gukorana bya hafi kugira ngo ibiribwa biva muri Ukraine byoherezwa mu mahanga bibashe kugera ku babikeneye muri Afurika na Aziya."

Mu Burusiya na Ukraine havayo cyane ibihingwa birimo ingano, ibihwagari, ibikomoka kuri peteroli n’ibindi binyampeke byinshi.

Inteko Ishinga Amategeko ya Leta Zunze Ubumwe za Amerika iheruka kwemeza ingengo y’imari ya miliyari $40 y’inyongera ya gisirikare, ubukungu n’inkunga kuri Ukraine.

Perezida Joe Biden yaherukaga gusaba Inteko Ishinga Amategeko kwemeza ingengo y’imari ya miliyari $33 yo gufasha Ukraine, ariko abagize inteko bahitamo kongera iyo nkunga ya gisirikare n’ubutabazi.

Leta Zunze Ubumwe za Amerika zimaze guha Ukraine intwaro zifite agaciro ka miliyari T $3.5, kuva iyi ntambara yatangira muri Gashyantare 2022.

Ibitero by’u Burusiya byacitse intege - NATO

Umwe mu badipolomate bakomeye muri NATO yatangaje ko amakuru y’ubutasi yerekana ko ibitero by’u Burusiya byacitse intege, ndetse icyizere kimaze kujya hejuru ko Ukraine izatsinda intambara.

Abadipolomate bakomeye b’ibihugu bigize NATO kuri iki Cyumweru bahuriye i Berlin mu Budage, haganirwa uburyo bwo kongera inkunga y’intwaro zihabwa Ukraine no gushyigikira intambwe za Finland na Suède mu kwinjira muri NATO.

Umunyamabanga mukuru wungirije wa NATO, Mircea Geoana, yagize ati "Ibitero bibabaje by’u Burusiya birimo gutakaza imbaraga. Tuzi neza umuhate w’ingabo n’abaturage ba Ukraine, ndetse ku nkunga yacu, Ukraine ishobora gutsinda iyi ntambara."

Ukraine ikomeje kwifashisha intwaro ihabwa n'u Burayi na Amerika mu kurasa ibikoresho by'igisirikare cy'u Burusiya

Kuba ibitero by’u Burusiya mu gace k’Iburasirazuba kazwi nka Donbass byaracitse intege kandi, NATO ibihurizaho n’ubutasi bw’u Bwongereza.

Buvuga ko u Burusiya bwananiwe kwigarurira uduce twinshi nk’uko bwabyifuzaga, ndetse bushobora kuba bumaze "gutakaza hafi kimwe cya gagatu cy’igabo zirwanira ku butaka bwohereje muri Gashyantare."

Ayo makuru y’ubutasi akomeza ati "Bijyanye n’uko ibintu bimeze ubu, biragoye ko u Burusiya bwabasha kwihutisha ibikorwa byabyo mu minsi 30 iri imbere."

Ukraine yarashe ku butaka bw’u Burusiya

Umuntu umwe yakomerekeye mu gitero cya missile yarashwe n’Ingabo za Ukraine, igwa mu gace ka Sereda.

Guverineri w’Intara ya Volgograd, Vyacheslav Gladkov, yatangaje ko iki gitero cyagabwe kuri uyu wa Gatandatu nk’uko yabitangarije kuri Telegram.

Uwo mujyi uherereye mu karere ka Shebekinsky, hafi y’umupaka wa Ukraine.

Turikiya ikomeje kwikoma Suède na Finlande

Minisitiri w’Ububanyi n’amahanga wa Turikiya, Mevlüt Çavuşoğlu, yamaganye Finlande na Suède ubu biri mu nzira zo kwinjira muri NATO, abishinja ko bitera inkunga imitwe ifatwa nk’iy’iterabwoba kuri Turikiya.

Minisitiri Mevlüt Çavuşoğlu yashinje Finlande gutera inkunga umutwe wa PKK (Kurdistan Workers’ Party) ufatwa nk’uw’iterabwoba, unagaba ibitero kuri icyo gihugu guhera mu 1984.

Yakomeje ati "Ikibazo ni uko ibi bihugu bibiri bishyigikira byeruye ndetse bifatanya na PKK na YPG [People’s Protection Units],"

Yakomeje ati "Iyi ni imitwe y’iterabwoba byakomeje kugaba ibitero ku ngabo zacu buri munsi."

Ubwo yari ageze i Berlin mu nama ya NATO kuri uyu wa Gatandatu, yavuze ko "bidakwiye ndetse bibabaje cyane kuba inshuti zacu n’abafatanyabikorwa bashyigikira iyi mitwe y’iterabwoba."

"Ibi ni ibibazo dukeneye kuganira n’abafatanyabikorwa bacu ba NATO, hamwe n’ibi bihugu [Suede na Finlande]."

Minisitiri w'Ububanyi n'amahanga wa Turikiya, Mevlüt Çavuşoğlu
U Burusiya bukomeje kugenda gake mu ntambara na Ukraine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .