Facebook yatumye umutungo wa Zuckerberg ugabanukaho miliyari $17.4

Yanditswe na Ishimwe Israel
Kuya 18 Ugushyingo 2018 saa 09:43
Yasuwe :
0 0

Umutungo w’Umuherwe Mark Zuckerberg wagabanutseho miliyari $17.4 muri uyu mwaka nyuma y’uko Facebook Inc. yongeye kotswa igitutu ku bijyanye no kwivanga k’u Burusiya mu matora ya Amerika.

Imigabane y’uru rubuga nkoranyambaga yagabanutseho 3% ku wa Gatanu igera kuri $139.53, igipimo kiri hasi kuva muri Mata 2017.

Zuckerberg w’imyaka 34 yari ku mwanya wa gatatu w’abafite agatubutse ku Isi inyuma ya Jeff Bezos na Bill Gates, yahise amanuka agera ku wa gatandatu ku rutonde rwa Bloomberg Billionaires Index.

Umutungo w’uyu Munyamerika ubarirwa muri miliyari $55.3, wagabanutseho miliyari $31 kuva ku wa 25 Nyakanga. Akurikiwe na Larry Ellison uri mu batangije Ikigo gikora software cya Oracle mu 1977, afite miliyari $54.7.

Zuckerberg yongeye kotswa igitutu nyuma y’uko itsinda ry’Abasenateri bo mu Ishyaka ry’Aba-Démocrates risabye ko asobanura amakuru ashinja ikigo cye kugerageza guhindura ibyiyumviro by’abaturage no guha urwaho icengezamatwara ry’u burusiya ku mbuga nkoranyambaga.

Mu matora y’abadepite n’abasenateri aheruka muri Amerika ku wa 6 Ugushyingo 2018, Facebook yakuyeho zimwe muri konti zayo n’iza Instagram nyuma y’amakuru yahawe n’Urwego rushinzwe Iperereza muri Amerika (FBI), ko u Burusiya bushobora kongera kwivanga mu matora.

Raporo nyinshi zakunze kugaragaza ko u Burusiya bwivanze mu matora ya Amerika, bunafasha Donald Trump kwicara ku butegetsi, ahigitse Hillary Clinton bari bahanganye mu matora ya 2016.

Facebook yatangaje ko Abarusiya bayikoresheje boherereza Abanyamerika inyandiko za politiki [Posts] zirenga 80 000 mu gihe cy’amatora ya 2016.

Muri Mata 2018, Facebook yavuze ko habarurwaga abagera kuri miliyoni 126 bayikoresha n’abari kuri Instagram miliyoni 20 bahawe amakuru n’ikigo gifitanye isano n’u Burusiya.

Umutungo wa Mark Zuckerberg washinze Facebook waragabanutse muri uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza