Espagne: Inzu y’imikino yahinduwe aho gushyira imirambo y’abishwe na Coronavirus

Yanditswe na IGIHE
Kuya 24 Werurwe 2020 saa 11:34
Yasuwe :
0 0

Imibare y’abantu bahitanwa na Coronavirus muri Espagne ikomeje kwiyongera umusubirizo ku buryo byageze n’aho icyumba gikoreshwa mu mikino yo mu nzu irimo “Ice skating” i Madrid cyahinduwemo ahazajya hatunganyirizwa imirambo.

Kuri uyu wa Kabiri nibwo imodoka za mbere zitwaye imirambo zageze muri icyo cyumba. Magingo aya, Espagne ni igihugu cya kane ku Isi cyibasiwe cyane na Coronavirus aho abantu 2696 bamaze gupfa mu barenga ibihumbi 40000 barwaye.

Mu ijoro rimwe, byatangajwe ko abantu 6600 banduye iki cyorezo naho abarenga 500 bitaba Imana. Igihangayikishije ni uko n’abaganga batangiye kwandura aho bivugwa ko 14% by’abanduye ari abatanga serivisi z’ubuzima.

Urwego rwari rusanzwe rushinzwe iby’amarimbi i Madrid, rwari rwatangaje ko rugiye kuba ruhagaritse ibikorwa kuko abakozi barwo bashiriwe n’ibikoresho bibafasha kwikingira. Uru rwego rugenzura amarimbi 14 ari mu Murwa Mukuru, Madrid.

Gusa ibikorwa byo gushyingura byo rurakomeza rubikore ariko mu gihe cyose imirambo izajya izanwa iri mu masanduku afunze neza aho kugira ngo bikorwe n’abakozi barwo kuko bo badafite ibikoresho bibakingira.

Urwego rushinzwe ubutabazi mu gisirikare rwahise rwitiza icyumba cyari gisanzwe gikinirwamo, kugira ngo abe ariho rutunganyiriza imirambo mbere yo kuyishyikiriza abajya gushyingura.

Madrid magingo aya ni izingiro rya Coronavirus muri Espagne ndetse ubuyobozi bwayo bwatangaje ko byitezwe ko nibura 80% by’abaturage bawo bashobora kwandura iki cyorezo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .