Espagne: Impfu zishobora kwikuba inshuro eshanu mu nzu z’abageze mu za bukuru

Yanditswe na Twarabanye Venuste
Kuya 9 Mata 2020 saa 08:57
Yasuwe :
0 0

Abayobozi muri Espagne babonye umubare udasanzwe w’abapfuye muri Werurwe 2020 mu nzu zicumbikira abageze mu za bukuru ariko benshi muri bo ntibapimwe COVID-19 iterwa n’agakoko ka Coronavirus kubera ubuke bw’ibikoresho.

Espagne iri mu bihugu byibasiriwe cyane na Coronavirus kuko 152 446 bayanduye, muri bo 15 238 bamaze kwitaba Imana.

Le Parisien yatangaje ko umubare w’impfu za Coronavirus mu nzu zicumbikira abageze mu za bukuru mu Mujyi wa Madrid ushobora kwikuba inshuro eshanu z’imibare yatangajwe, itarimo abagera ku 3500 batigeze basuzumwa nkuko byatangajwe n’abayobozi kuri uyu wa Gatatu.

Mu kiganiro n’Itangazamakuru, Umuvugizi wa Madrid, Ignacio Aguado yavuze ko kuva tariki 8 Werurwe kugeza ku ya 8 Mata 2020 abantu 4 750 bamaze gupfa muri 50 000 bari mu nzu z’abageze mu za bukuru i Madrid, umujyi wakozweho na Coronavirus cyane muri Espagne.

Ati “Muri bo 781 byemejwe ko bazize COVID-19 […] 3479 bari bafite ibimenyetso bya Coronavirus ariko ntibyemejwe n’isuzuma. Imibare yariyongereye cyane kurusha mu kwezi gusanzwe.”

Espagne ni igihugu cya gatatu gifite umubare munini w’abari gupfa bazize Coronavirus bageze ku 15 238 nyuma ya Leta Zunze Ubumwe za Amerika zifite 16 231 ku mwanya wa Kabiri n’u Butaliyani bufite 18 279.

Gusa birakekwa ko imibare ishobora kuba irenze itangazwa muri Espagne kubera ko abatangazwa ari abasuzumwe ndetse bagasanganwa Coronavirus.

Iyo mibare ntabwo irimo abantu bapfa bagaragaza ibimenyetso ariko batarasuzumwa kubera ubuke bw’ibikoresho, kandi abatari mu mibare itangazwa ngo biganjemo abo mu nzu z’abageze mu za bukuru.

Minisiteri y’Ingabo yatanze abasirikare bajya gutera imiti yica udukoko twa Coronavirus mu nyubako z’abageze mu za bukuru, yatangaje ko hari abatawe ku buryo basanze hari n’abapfiriye mu bitanda byabo ntibyamenyekana. Iperereza rikaba ryatangiye nkuko Minisitiri w’Ingabo Margarita Robles yabivuze.

Impfu zishobora kwikuba inshuro eshanu mu nzu z’abageze mu za bukuru mu Mujyi wa Madrid muri Espagne

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .