00:00:00 IGIHE NETWORK KN KINYARWANDA EN ENGLISH FR FRANCAIS

Elon Musk mu nzira zo gutera icyuhagizo Assange na Snowden bahigwa bukware na Amerika

Yanditswe na IGIHE
Kuya 5 Ukuboza 2022 saa 09:14
Yasuwe :

Umunyemari Elon Musk yatangije amatora yo kuri Twitter agamije kureba abashyigikiye ko Edward Snowden na Julian Assange, bakurikiranyweho ibyaha byo gushyira hanze amabanga ya Leta Zunze Ubumwe za Amerika bababarirwa ndetse n’abashyigikiye ko bakanirwa urubakwiriye.

Mu butumwa Elon Musk yashyize kuri Twitter mu mpera z’icyumweru gishize yagize ati “Ntabwo ngamije kwerekana uruhande ndiho, ariko nk’uko nabasezeranyije aya matora, mubona Assange na Snowden bakwiriye kubabarirwa?”

Aya matora yagizwemo uruhare n’abarenga miliyoni 1,3 yarangiye abagera kuri 79% batoye umwanzuro wo kubabarira aba bagabo mu gihe 21% batoye basaba ko bakanirwa urubakwiye, gusa ntibiramenyekana niba ibitekerezo by’aba baturage bizagira uruhare mu myanzuro Leta ya Amerika ikomeje gufatira Snowden na Assange.

Edward Snowden akurikiranyweho ibyaha byo gushyira hanze amabanga y’ubutasi bwa Leta Zunze Ubumwe Za Amerika.

Ibi byaha Snowden ashinjwa ko yabikoze mu 2013 ubwo yakoraga mu nzego z’ubutasi za Amerika zirimo CIA na National Security Agency. Ibirego byaje kwiyongera mu 2019, ubwo yashyiraga hanze igitabo yise "Permanent Record" atabiherewe uburenganzira n’izi nzego, nk’uko byateganywaga n’amasezerano bagiranye akiri umukozi wazo.

Ngo ayo masezerano yavugaga ko igihe Snowden yagira ikintu ashaka gutangaza kirebana n’amakuru y’iperereza, agomba gushyikiriza izo nzego inyandiko ze ngo zirebe niba amakuru azikubiyemo ntacyo atwaye. Nyamara uyu mugabo byarangiye asohoye iki gitabo, abikora atabanje kugaragaza inyandiko ze ngo ahabwe uburenganzira bwanditse, nk’uko amasezerano abiteganya.

Kugeza ubu Snowden aba mu Burusiya ndetse yamaze guhabwa ubwenegihugu na Perezida Putin.

Julian Assange we ni Umunya-Australie umaze igihe ashakishwa n’ubutabera bwa Amerika, bushaka kumucira urubanza kubera amabanga yamennye, aho kuva mu 2010 yashyize hanze inyandiko zigera ku bihumbi 700 zerekeye ibikorwa bya gisirikare na dipolomasi bya Amerika by’umwihariko kuri Irak na Afghanistan.

Kugeza ubu uyu mugabo afungiye mu Bwongereza, gusa biteganyijwe ko ashobora koherezwa muri Amerika.

Elon Musk mu nzira zo gutera icyuhagizo Assange na Snowden bahigwa bukware na Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .