Edward Snowden yinjiriye ikoranabuhanga rya CIA ashaka ukuri ku mibereho y’ibivejuru

Yanditswe na Ishimwe Israel
Kuya 25 Ukwakira 2019 saa 10:17
Yasuwe :
0 0

Umunyamakuru Edouard Snowden wabaye umukozi mu Kigo cy’Igihugu gishinzwe Iperereza muri Leta Zunze Ubumwe za Amerika yahinyuje ibyatangajwe kenshi ko mu gace kazwi nka Area 51 habarizwamo indiri y’ibivejuru (aliens).

Edward Snowden yabitangaje nyuma y’igenzura yakoze mu ikoranabuhanga rya CIA ashaka gihamya ku mibereho y’ibivejuru.

Muri Nyakanga 2019, Abanyamerika basaga ibihumbi 45 babinyujije kuri Facebook bagaragaje ko bifuza kujya gusura Area 51, agace kavugwamo ibivejuru byinshi.

Ako gace gaherereye muri Leta ya Nevada iri mu Burengerazuba bwa Amerika. Hubatse Ikigo cya Gisirikare cy’Abanyamerika, kimwe mu bya mbere birindiwe umutekano ku Isi.

Guhera mu myaka ya 1950, inshingano nyamukuru z’icyo kigo ntizizwi neza dore ko na Leta ya Amerika itajya ibitangaza.

Bivugwa ko ako gace kaba kabarizwamo ibinyabuzima bidasanzwe bizwi nk’ibivejuru ndetse bamwe bavuga ko byaba bikorerwaho ubushakashatsi.

Ako gace karinzwe n’imitwe myinshi y’abasirikare ndetse kazengurutswe n’ikoranabuhanga rigenzura buri cyose gishaka kuhinjira. Bivugwa ko n’abasirikare ba Amerika bakorera hafi aho iyo hari uwibeshye akajya aho atemerewe abihanirwa bikomeye.

CNN yanditse ko mu gitabo gishya “Permanent Record” giheruka gutangazwa na Snowden ku wa 17 Nzeri 2019, yagaragaje ko ibivejuru ntaho yabibonye mu ikoranabuhanga rya CIA.

Edward Snowden yamamaye cyane ubwo yashyiraga hanze amabanga y’ubutasi bwa Amerika; cyane ko yahoze akorana n’izo nzego ku buryo amenya amabanga yazo ahishe.

Yavuze ko Guverinoma ya Amerika nta makuru afatika ifite ku bijyanye n’ubuzima bw’ibintu bitari ku Isi.

Mu gitabo cye hari aho yavuze ko “Amakuru ahari navuga ko ibivejuru bitigeze bikandagira ku Isi cyangwa ngo biboneke mu iperereza ryakozwe na Amerika.’’

Uyu mugabo w’imyaka 36 avuga ko ibyo kugera ku kwezi byo byabayeho.

Ati “Niba wabyibazaga, nibyo hari uwageze ku kwezi. Impinduka z’ikirere ni ukuri. Ibitangazwa ku bisigazwa byatawe mu kirere n’indege ibyitwa [chemtrail conspiracy theory], ntiwabiha agaciro.’’

Snowden yavuze ko abantu benshi bakunda kumva ibintu bisa n’ibiri mu kirere cyane kuko byoroshya ubuzima kandi bituma abantu bizera ko hari ugenzura ibintu runaka.

Edward Joseph Snowden ni Umunyamerika washyize hanze amabanga y’igihugu cye ajyanye n’ubutasi mu 2013.

Minisiteri y’Ubutabera ya Leta Zunze Ubumwe za Amerika iheruka kumujyana mu nkiko imushinja kurenga ku masezerano yagiranye n’inzego z’ubutasi ubwo yasohoraga igitabo cye gishya.

Ashinjwa gushyira hanze amabanga menshi yagiye agerwaho n’inzego z’iperereza za Amerika, afitanye amasezerano n’inzego zirimo CIA na National Security Agency (NSA), yasinywe hagati y’imyaka ya 2005 na 2013 ubwo yakoranaga nazo.

Ngo ayo masezerano yavugaga ko igihe Snowden yagira ikintu ashaka gutangaza kirebana n’amakuru y’iperereza, agomba gushyikiriza izo nzego inyandiko ze ngo zirebe niba amakuru azikubiyemo ntacyo atwaye.

Snowden unashinjwa na Guverinoma ya Amerika ibyaha by’ubutasi no kwiba umutungo wa Amerika, aba mu Burusiya mu buhungiro yishyizemo mu myaka itandatu ishize.

Muri Zone 51 ni hamwe mu havugwa ko habamo ibivejuru ariko ntibizwi neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza