Donald Trump yaba ari mu bazakingirwa COVID-19?

Yanditswe na IGIHE
Kuya 9 Ukuboza 2020 saa 12:52
Yasuwe :
0 0

Ibibazo bikomeje kuba byose kuri Perezida wa Leta Zunze Ubumwe za Amerika, Donald Trump, hibazwa niba azaba umwe mu bazahabwa urukingo rw’icyorezo cya COVID-19, kuko yamaze kucyandura ndetse akagikira, mu gihe yakomeje kugikerensa kuva cyaduka.

Umwe mu bakozi bo muri White House yatangaje ko hagikenewe kumenya niba umuntu wamaze kwandura Coronavirus ndetse akayikira nyuma y’uko umubiri we wubatse abasirikare bashobora kuyirwanya, azaba umwe mu bazahabwa urukingo ku ikubitiro rwagenewe abari mu byago byinshi byo kuzahazwa nacyo.

Ntabwo inzego z’ubuzima za Leta Zunze Ubumwe za Amerika zirabasha gutanga umucyo kuri icyo kibazo.

Abahoze ari abayobozi ba Leta Zunze Ubumwe za Amerika, George W. Bush, Bill Clinton na Barak Obama, baherutse gutangaza ko biteguye guhabwa urukingo rwa COVID-19 ndetse byashoboka bakaruherwa imbere ya za kamera (camera), hagamijwe kwerekana ko rwizewe, ku buryo umuntu wese yaruhabwa atekanye.

Nk’uko ibinyamakuru bitandukanye byabitangaje, ntabwo biramenyekana niba mu bazahabwa urukingo b’ibanze muri Leta Zunze Ubumwe za Amerika hazaba harimo abigeze kwandura COVID-19 bakayikira, barimo nka Donald Trump.

Umwe mu bayobozi bakuru yagize ati "Ni ibintu bigisuzumwa. Gusa yagaragaje ubushake bwo kubikora."

Mu butumwa yanyujije kuri Twitter mu Ukwakira nyuma yo gukira Coronavirus, Trump yavuze ko kuba yakize Coronavirus bivuze ko adashobora kongera kuyandura.

Ntabwo Leta Zunze Ubumwe za Amerika ziremeza ko urukingo rwa COVID-19 rutangira gutangwa, gusa mu isuzuma ry’ibanze ry’ikigo gishinzwe ibiribwa n’imiti, ku rukingo rwakozwe na Pfizer/BioNTech, ryerekanye ko rufasha mu kurinda umuntu kuri n95% kandi nta zindi ngaruka rumugiraho.

Biteganywa ko US FDA izaterana kuri uyu wa Kane ngo ifate icyemezo cya nyuma kuri uru rukingo.

U Bwongereza bwabimburiye ibindi bihugu gutanga urukingo kuri uyu wa Kabiri, ku ikubitiro ruhabwa umukecuru ufite imyaka 90.

Haribazwa niba Trump azaba umwe mu bakingirwa COVID-19 (Ifoto ya Jonathan Ernst/Reuters)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .