Cristiano Ronaldo yaciye agahigo ko gutsinda ibitego byinshi mu mateka ya ruhago

Yanditswe na Ndahayo Emmanuel
Kuya 21 Mutarama 2021 saa 02:27
Yasuwe :
0 0

Rutahizamu kabuhariwe ukinira ikipe ya Juventus yo mu Butaliyani, Cristiano Ronaldo, yaciye agahigo ko kuba umukinnyi wa mbere ku Isi utsinze ibitego byinshhi mu mupira w’amaguru, nyuma y’uko atsinze igitego cya mbere mu mukino Juventus yatsinzemo Napoli ibitego 2-0 igahita inegukana igikombe cy’Igihugu.

Icyo gitego cya Ronaldo cyujuje umubare w’ibitego 760 uyu mugabo amaze gutsinda, mu mikino 910 amaze gukina nk’umukinnyi wabigize umwuga, aho yabitsinze mu makipe ya Sporting Lisbon yatsindiye ibitego bitanu, Manchester United yatsindiye ibitego 118, Real Madrid yatsindiye ibitego 450, Juventus amaze gutsindira ibitego 85 ndetse n’ikipe y’igihugu amaze gutsindira ibitego 102, ari nawe umaze kuyitsindira ibitego byinshi.

Ronaldo kandi yagaragaje ubushobozi bwo gutsinda ibitego akoresheje uburyo butandukanye, aho yatsinze ibitego 488 akoresheje ukuguru kw’iburyo, mu gihe ibindi 139 yabitsindishije ukuguru kw’ibumoso, 131 abitsindisha umutwe naho ibindi bibiri abitsindisha ibindi bice by’umubiri, harimo icyo yigeze gutsindisha inkokora.

Mu gihe ikipe ye yakiniraga ku kibuga cyayo, Ronaldo yatsinze ibitego 410, atsinda ibindi 304 ku bibuga by’amakipe bari bahanganye, maze ibindi 46 abitsindira ku bibuga rusange, nko ku mikino ya nyuma ndetse no mu marushanwa mpuzamahanga.

Ronaldo yatsinze ibitego bitatu mu mukino umwe inshuro 46, atsinda ibitego bibiri mu mikino 136, atsinda ibitego bine mu mukino umwe inshuro umunani, ndetse anatsinda ibitego bitanu mu mukino umwe inshuro ebyiri.

Ronaldo yatsinze igitego kuri buri munota wose ukinwa mu kibuga, kuva ku munota wa mbere kugera ku wa 90. Imibare igaragaza ko hagati y’umunota wa 79 na 90, ari bwo Ronaldo atsinda ibitego byinshi, amaze gutsinda ibitego 178 muri icyo gihe cy’umukino, ari na cyo gihe kimuhira mu mukino kurusha ibindi byose.

Mu mukino hagati, Ronaldo yatsinze ibitego 569, bingana na 75% by’ibitego yatsinze. Ibindi 57 yabitsinze ku mipira y’imiterekano (coup francs) mu gihe ibindi 134 yabitsinze kuri panaliti.

Nyuma ya Ronaldo, Josef Bican aza ku mwanya wa kabiri ku rutonde rw’abakinnyi bamaze gutsinda ibitego byinshi ku Isi, aho yatsinze ibitego 759, agakurikirwa na Pele ufite ibitego 757 ku mwanya wa gatatu ndetse na Romario ufite ibitego 743.

Lionel Messi aza ku mwanya wa gatanu mu bakinnyi bamaze gutsinda ibitego byinshi, aho afite ibitego 719. Messi ni we mukinnyi ufite amahirwe yo guhanganira na Ronaldo aka gahigo k’uwatsinze ibitego byinshi ku Isi, dore ko arushwa na Ronaldo ibitego 41, n’ubwo Ronaldo yakinnye imikino 150 kumurusha. Ikindi ni uko Messi arushwa imyaka ibiri na Ronaldo.

Ku rundi ruhande, Ronaldo uzuzuza imyaka 36 mu kwezi gutaha, atangaza ko nta gahunda yo kureka gukina afite vuba aha, kuko yumva umubiri we ukimeze neza.

Yagize ati “Numva nkifite imbaraga kandi ndi mu bihe byiza mu buzima bwanjye. Ndizera ko nzakina indi myaka myinshi, ariko ntuzi igishobora kuba ku muntu. Uyu ni umupira w’amaguru, ntituzi ikizaba ejo, ariko mu maso yanjye mba mbona ejo hanjye ari heza cyane”.

Ronaldo amaze gutwara hafi ibikombe byose yakiniye, gusa aherutse gutangaza ko igikombe yifuza gutwara kurusha ibindi ari igikombe cy’Isi, aho kizakinirwa muri Qatar mu mwaka utaha, icyo gihe Ronaldo azaba afite imyaka 37.

Cristiano Ronaldo ni we mukinnyi umaze gutsinda ibitego byinshi mu mateka y'umupira w'amaguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .