00:00:00 IGIHE NETWORK KN KINYARWANDA EN ENGLISH FR FRANCAIS

Covid-19 yongeye gukaza umurego mu Bushinwa

Yanditswe na Umwali Zhuri
Kuya 21 Ugushyingo 2022 saa 01:41
Yasuwe :

Umurwa Mukuru w’u Bushinwa, Beijing, watangaje ko icyorezo cya Covid-19 cyongeye gukaza umurego, hafatwa ingamba zikomeye zirimo gufunga bimwe mu bikorwa by’ubucuruzi no kugabanya urujya n’uruza rw’abantu.

Bibaye nyuma y’uko umubare w’abandura ku munsi muri icyo gihugu wiyongereye mu mpera z’icyumweru gishize, nk’aho kuri iki cyumweru handuye abantu 26.824.

Umujyi wa Beijing wonyine kuri iki Cyumweru wabonetsemo abanduye bashya 962, bavuye kuri 621 bari babonetse kuwa Gatandatu. Mu masaha ya mbere yo kuri uyu wa Mbere hari hamaze kuboneka abanduye bashya 316.

Muri Beijing ibikorwa bihuza abantu benshi nk’amashuri, ibiro byafunzwe ndetse mu masoko naho hagaragaraye urujya n’uruza ruke nk’uko Reuters yabitangaje.

Kuwa Gatandatu no ku Cyumweru hapfuye abantu babiri bishwe n’icyo cyorezo, biba impfu za mbere icyo gihugu kigize ziturutse kuri Covid-19 uhereye muri Gicurasi uyu mwaka.

Utundi duce dutandukanye tw’u Bushinwa twatangiye gufata ingamba zikomeye mu kwirinda ubwandu bwa Covid-19, nk’aho mu Mujyi wa Guangzhou uri mu Majyepfo y’igihugu hashyizweho Guma mu Rugo y’iminsi itanu, by’umwihariko mu Karere ka Baiyun ari nako gatuwe cyane.

Gukaza umurego kw’iki cyorezo kuje nyuma y’iminsi mike u Bushinwa butangiye koroshya ingamba zo guhangana na Covid-19 nk’aho ingendo zimwe na zimwe zerekezayo zari zatangiye gukomorerwa, abagana muri icyo gihugu bakagabanyirizwa igihe basabwaga kumara mu kato, biva ku minsi irindwi ijya kuri itanu.

Kongera gukaza umurego kw’iki cyorezo bishobora kuza gukoma mu nkokora gahunda u Bushinwa bwari bwarihaye yo guhashya Covid-19 izwi nka Zero Covid Policy.

U Bushinwa bwakajije ingamba zo guhashya icyorezo cya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .