Umwe mu bayobozi ba Amerika waganiriye na Al Jazeera ariko ntiyifuze ko amazina ye ashyirwa hanze, yavuze ko iki gihugu giteganya gusubizaho amabwiriza yo kwirinda iki cyorezo ku bagenzi bava mu Bushinwa kuko batizeye amakuru ajyanye na COVID-19 asigaye atangwa n’iki gihugu.

Ati “Impungenge z’amahanga ku bwiyongere bwa COVID-19 mu Bushinwa ziri kugenda zirushaho kuzamuka kandi biragaragara ko nta makuru y’ukuri ari gutangwa.”

Kugeza ubu iki gihugu ntikiratangaza ubwoko bw’ingamba gishobora gushyiraho.

Amarerika ifashe iki cyemezo mu gihe hakomeje gucicika amakuru avuga ko COVID-19 yaba yarongeye gukaza umurego mu Bushinwa, aho abaturage bagera kuri miliyoni 248 banduye Covid-19, ni ukuvuga ko bangana na 18% by’abaturage bose b’u Bushinwa.

Bivugwa kandi ko icya kabiri cy’abaturage bo mu Majyepfo y’u Bushinwa mu Ntara ya Sichuan n’abo mu Murwa Mukuru, Beijing, bashobora kuba baranduye Covid-19 guhera mu ntangiriro z’uku kwezi.

Ibi kandi bihuriranye n’uko komisiyo ishinzwe ubuzima mu Bushinwa (NHC), iherutse gutangaza ko iki gihugu kitazongera gushyira hanze imibare ya buri munsi y’abanduye n’abishwe na Covid-19.

Nubwo amahanga yatangiye kugaragaza impungenge kuri COVID-19 iri mu Bushinwa, inzego z’ubuzima muri iki gihugu zatangaje ko guhera ku wa 8 Mutarama 2023, abagenzi binjira muri iki gihugu batazongera kunyuzwa mu kato nk’uko byari bimaze imyaka itatu bikorwa mu kwirinda ikwirakwira rya COVID-19.

Amerika yatangaje ko iri mu nzira zo gukaza ingamba ku bagenzi bava mu Bushinwa mu rwego rwo kwirinda COVID-19