U Bufaransa: Coronavirus yatumye amashuri 22 afunga imiryango nyuma y’icyumweru kimwe atangiye

Yanditswe na Ndahayo Emmanuel
Kuya 5 Nzeri 2020 saa 09:08
Yasuwe :
0 0

Leta y’u Bufaransa yafashe icyemezo cyo gufunga amashuri agera kuri 22 kubera ikwirakwira ry’icyorezo cya Coronavirus, nyuma y’icyumweru kimwe gusa atangiye.

Amashuri 10 mu yafunze ari mu Bufaransa, mu gihe andi 12 ari ku kirwa cya Reunion n’ubundi cy’icyo gihugu.

Minisitiri w’Uburezi Jean-Michel Blanquer yavuze ko ikibazo muri rusange kidakomeye kuko amashuri yafunzwe ari 22 mu mashuri 60 000 ari mu Bufaransa, bityo ko ari umubare muto udakwiye guteza impagarara.

Yavuze ko amashuri agera mu 120 ashobora guhagarikwa, aherereye mu bice bya Haute-Loire, Rhône na Bretagne.

Yongeyeho ko muri rusange igihugu cyashyizeho amabwiriza akarishye yo kwirinda icyorezo cya Coronavirus, gusa ko “iyo ku ishuri habonetse abantu barenze batatu banduye Coronavirus, ishuri rihita rifungwa”.

Icyorezo cya Coronavirus muri rusange cyarushijeho gukaza umurego mu minsi ishize mu Bufaransa, aho ku wa Gatatu no ku wa Kane handuye abarenga 7 000 ku munsi umwe.

Umubare kandi w’abashyirwa mu bitaro wariyongereye, ndetse n’abashyirwa ku byuma byongera umwuka bariyongereye muri iyi minsi mu Bufaransa.

Ishyirahamwe ry’ababyeyi b’abanyeshuri biga mu bigo mu Bufaransa (FCPE), rivuga ko ababyeyi benshi bazagorwa no gukomeza inshingano zabo mu gihe abanyeshuri benshi basubizwa mu rugo kubera ikwirakwira rya Coronavirus.

Umwe mu bayobozi ba FCPE, Alixe Rivière yagize ati “nta biganiro byabayeho byo gutegura uburyo ababyeyi bazitwara mu bihe nk’ibi. Ni bo basigirwa inshingano zo guhitamo icyo gukora zirimo no gupimisha abana babo, ibi si bwo buryo bwiza byakabaye bikorwamo”.

Uyu mubyeyi kandi yanavuze ko kuba leta yarahaye akazi abarimu bashya 1 700 bonyine bidahagije, avuga ko bari bakwiye kongerwa.

Amwe mu mashuri yongeye gufungwa kubera icyorezo cya COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .