Coronavirus: Urukiko rwo mu Bufaransa rwategetse Guverinoma koroshya ingamba zashyiriweho insengero

Yanditswe na IGIHE
Kuya 30 Ugushyingo 2020 saa 02:47
Yasuwe :
0 0

Urukiko rw’Ikirenga mu Bufaransa rwategetse Guverinoma kongera gutekereza ku ngamba yafashe zijyanye n’umubare w’abantu bemerewe kwinjira ahantu ho gusengera nk’imwe mu ngamba zo kwirinda icyorezo cya Coronavirus.

Ni ubusabe bwatangajwe ku Cyumweru nyuma y’uko ingamba zo kwemerera abantu batarenga 30 kwinjira mu nsengero zo mu Bufaransa zatangiraga kubahirizwa.

Izi ngamba ntizakiriwe neza ndetse hari abagaragaje ko amabwiriza ya Guverinoma ‘adakwiye ndetse avangura’.

Urukiko rw’Ikirenga rwategetse Minisitiri w’Intebe w’u Bufaransa, Jean Castex, gusubiramo ingamba zafashwe bitarenze iminsi itatu.

Ku mugoroba wo ku wa Kabiri, Perezida w’u Bufaransa, Emmanuel Macron, yari yatangaje ko ubuzima bugiye kugaruka nk’ubusanzwe guhera ku wa Gatandatu.

Insengero, imisigiti n’ahandi hasengerwa mu Bufaransa hongeye gufungurwa mu mpera z’icyumweru gishize, ariko nke cyane ni zo zasengewemo.

Mu Bufaransa, gahunda ya Guma mu rugo yashyizweho kuva ku wa 30 Ukwakira biteganyijwe ko izakurwaho ku wa 15 Ukuboza 2020 mu gihe ubwandu bushya buzaba buri munsi ya 5,000 ku munsi.

Inzu zerekanirwamo sinema, ahakinirwa ikinamico n’ingoro ndangamurage nibwo na zo zizemererwa gufungura ariko hubahirizwa ingamba zizagenwa.

Kuva icyorezo cya COVID-19 cyaboneka mu Bufaransa, abantu miliyoni 2.2 bamaze kuyandura, 161 000 barakize mu gihe 52,325 bitabye Imana.

Mu Bufaransa abantu 30 gusa ni bo bemerewe kwinjira mu nsengero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .