Coronavirus kuwa 18 Mata: Abantu 2535 bongeye gupfa ku munsi umwe muri Amerika

Yanditswe na Habimana James
Kuya 18 Mata 2020 saa 09:27
Yasuwe :
0 0

Nyuma y’aho tariki 16 Mata 2020, Leta Zunze Ubumwe za Amerika zari zapfushije abantu 2290 mu masaha 24, tariki 17 uku kwezi iki gihugu cyongeye gupfusha abantu 2535 umunsi umwe gusa.

Ibi byatumye abamaze gupfa muri iki gihugu baba 37 175 mu gihe 710 272 bamaze kwandura.

Imibare igaragaza ko abamaze kwandura muri Leta Zunze Ubumwe za Amerika, baruta kure abamaze kwandura mu bihugu biyikurikira birimo Espagne, u Butaliyani, u Bufaransa n’u Budage ubiteranyije.

Kugeza ubu kandi imibare itangazwa na Kaminuza ya John Hopkins University yo muri Leta Zunze Ubumwe za Amerika, ivuga ko abapfuye muri iki gihugu ku wa Kane bashobora kuba ari 4,591, kuko ngo hari n’abapfa ariko imibare yabo ntishyirwe ku bishwe na Coronavirus kuko baba baguye mu ngo.

Nubwo iki gihugu gikomeje kugarizwa n’iki cyorezo, Perezida Donald Trump we yatangaje ko guhagarika ibikorwa ataricyo gisubizo kirambye mu gukemura ikibazo gihari, ndetse asaba abayobozi ba za leta kugenda bagabanya abantu bagasubira mu kazi.

Inzobere mu by’ubuzima zivuga ko ibi bishobora gutuma abapfa bakomeza kwiyongera.

Ishami ry’Umuryango w’Abibumbye ryita ku Buzima, OMS, ryamaze gutangaza ko abanduye Coronavirus ku Isi bageze ku 2251,815, abamaze gupfa ni 154 311 naho abamaze gukira ni 574 386.

Ibihugu bifite abanduye ndetse n’abapfuye benshi, ku mwanya wa mbere haracyari Leta Zunze Ubumwe za Amerika zifite abanduye 710 272, abamaze gupfa ni 37 175, Espagne ifite abantu 190 839 bamaze kwandura naho 20 002 bamaze gupfa, u Butaliyani bufite abanduye 172 434 mu gihe 22 745 bamaze gupfa.

Mu Bufaransa abantu 147 969 bamaze kwandura, abandi 18 681 bamaze gupfa.

U Budage bufite abanduye 141 397 mu gihe 4352 bapfuye, u Bwongereza bufite abanduye 108 692 ariko abamaze gupfa ni 14 576.

Ku Mugabane wa Afurika, Ishami ry’Umuryango w’Abibumye ryita ku buzima, OMS, ryatangaje ko uyu mugabane ushobora kuba igicumbi cya Coronavirus mu minsi iri imbere.

OMS ivuga ko abantu bagera ku bihugu 300 bashobora kwicwa n’iki cyorezo, bigatuma n’abaturage miliyoni 30 bajya mu bukene.

Uyu muryango uvuga ko igiteye ubwoba kuri uyu mugabane ni uko iki cyorezo ubu cyatangiye kuva mu Mijyi, cyerekeza mu bice by’icyaro.

Kugeza ubu abantu 20476 bamaze kwandura Coronavirus, abamaze gupfa bageze ku 1,024.

Kugeza ubu Misiri iri imbere mu kugira benshi banduye kuko ari 2844 mu gihe abamaze gupfa ari 205, ikurikirwa na Afurika y’Epfo ifite abanduye 2783 abapfuye ho bageze kuri 50.

Algeria niho hamaze gupfa abantu benshi muri Afurika kuko ari 364 mu gihe abamaze kwandura ari 2418.

Muri Afurika y’Iburasirazuba, Kenya niyo ikomeje kugira abanduye benshi kuko ubu bageze kuri 246 mu gihe abamaze gupfa ari 11 , mu Rwanda hamaze kuboneka abantu banduye 143 ariko abamaze gukira bageze kuri 65 , Uganda baracyari 55, muri Tanzania hamaze kuboneka abantu 147 hamaze gupfa batanu, mu Burundi habonetse batanu, hamaze gupfa umwe mu gihe muri Sudani y’Epfo ari bane banduye.

Amerika ikomeje kugarizwa cyane na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .