Coronavirus ku wa 23 Mata: Abantu barenga 6000 bapfuye umunsi umwe ku Isi

Yanditswe na Habimana James
Kuya 23 Mata 2020 saa 09:15
Yasuwe :
0 0

Ishami ry’Umuryango w’Abibumbye ryita ku buzima, OMS, rigaragaza ko kuri uyu wa Kane tariki 22 Mata 2020, abantu 6 575 bapfuye ku rwego rw’Isi bazize icyorezo cya Coronavirus, ibintu byatumye abamaze gupfa muri rusange bagera ku 184 263.

Imibare yo kuwa Kabiri yo yagaragazaga ko abapfuye bari 177 688 ku rwego rw’Isi.

Leta Zunze Ubumwe za Amerika ni zo zikomeje guhura n’akaga mu gupfusha no kugira abenshi bandura, kuko kuri uyu wa Gatatu iki gihugu cyapfushije abantu 2341 .

Ibi byatumye abamaze kwicwa na Coronavirus muri iki gihugu bagera ku 47 681 naho abamaze kwandura ni 849 092.

Ku rwego rw’Isi, abantu 2 639 025 bamaze kwandura mu gihe 184 263 bamaze gupfa naho 722 152 bamaze gukira.

Umuyobozi Mukuru wa OMS, Tedros Adhanom Ghebreyesus, yatangaje ko abantu bagomba kwitegura ko iki cyorezo gishobora kuzamara igihe, kuko usanga ibihugu byinshi ari bwo bigitangira gufata ingamba zo guhangana nacyo.

Yagize ati “Ntimukwiye gukora ikosa, turacyafite urugendo rurerure rwo guhangana nacyo, iyi virusi izakomeza kubana natwe igihe kirekire.”

Yavuze ko hari ibimaze gukorwa mu Burengerazuba bw’u Burayi mu guhangana n’iki cyorezo, ariko atangaza ko ibihugu bya Afurika na Amerika y’Epfo bagomba kwitonda.

Ibihugu bifite abanduye ndetse n’abapfuye benshi, ku mwanya wa mbere haracyari Leta Zunze Ubumwe za Amerika, Espagne iri ku mwanya wa kabiri aho ifite abantu 208 389 bamaze kwandura naho 21 717 bamaze gupfa, u Butaliyani bufite abanduye 187 327 mu gihe 25 085 bamaze gupfa.

Mu Bufaransa abantu 159 877 bamaze kwandura, abandi 21 340 bamaze gupfa.

U Budage bufite abanduye 150 648 mu gihe 5 315 bapfuye, u Bwongereza bufite abanduye 133 495 ariko abamaze gupfa ni 18 100.

Ku mugabane wa Afurika, abantu 26 676 ubu bamaze kwandura Coronavirus, abamaze gupfa bageze ku 1 244.

Misiri iri imbere n’abamaze kwandura benshi kuko ari 3 659 mu gihe abamaze gupfa ari 276 , ikurikirwa na Afurika y’Epfo ifite abanduye 3 635 abapfuye ho bageze kuri 65.

Algeria niho hamaze gupfa abantu benshi muri Afurika kuko ari 402 mu gihe abamaze kwandura ari 2 910.

Muri Afurika y’Iburasirazuba, Kenya niyo ikomeje kugira abanduye benshi kuko ubu bageze kuri 303 mu gihe abamaze gupfa ari 14 , mu Rwanda hamaze kuboneka abantu banduye 153 ariko abamaze gukira ni 84, Uganda abanduye ni 63, muri Tanzania hamaze kuboneka abantu 284 hamaze gupfa 10, mu Burundi abanduye ari 11,umwe ari we umaze gupfa naho Sudani y’Epfo ari bane banduye.

Abantu barenga 6000 bapfuye umunsi umwe bishwe na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .