Coronavirus ku wa 18 Gicurasi: Abamaze gupfa muri Amerika barenze ibihumbi 90

Yanditswe na Habimana James
Kuya 18 Gicurasi 2020 saa 09:47
Yasuwe :
0 0

Inzego z’ubuzima muri Leta Zunze Ubumwe za Amerika, zigaragaza ko abamaze kwicwa n’icyorezo cya Coronavirus bageze ku 90 978, ibi bituma iki gihugu gikomeza kwibasirwa kurenza ahandi ku Isi.

Kuri iki Cyumweru gusa, iki gihugu cyapfushije abantu 865 naho abandi 19 891 banduye.

Ibi byatumye abamaze kwandura iki cyorezo muri Leta Zunze Ubumwe za Amerika baba 1 527 664 naho 346 389 nibo bamaze gukira.

Kugeza ubu Ishami ry’Umuryango w’Abibumbye ryita ku Buzima, OMS, ryagaragaje ko abamaze kwandura Coronavirus ku bageze kuri 4 805 229, abamaze gupfa ni 316 732 naho abamaze gukira ni 1 860 056.

Hagati aho umuyobozi w’Umujyi wa São Paulo muri Brazil, Bruno Covas, yavuze ko uyu mujyi umerewe nabi ku buryo kubona aho baryamisha abarwaye iki cyorezo habaye ikibazo.

Yavuze ko ibitaro muri uyu Mujyi wageze ku rugero rwa 90% mu byumweru bibiri bishize.

Uyu mujyi gusa umaze gupfusha abantu barenga ibihumbi bitatu, naho mu masaha 24 ashize, iki gihugu cyagize abanduye 7 938, naho abandi 485 barapfa.

Kugeza ubu Leta Zunze Ubumwe za Amerika nizo zikomeje kuza imbere mu kugira umubare w’abanduye n’abamaze gupfa ku Isi, u Burusiya bwaje ku mwanya wa kabiri mu banduye kuko ari abantu 281 752, hamaze gupfa 2 631, Espagne iraza ku mwanya wa Gatatu kuko bufite abanduye 277 719 hamaze gupfa 27 650, mu Bwongereza handuye 243 695, hamaze gupfa 34 636, muri Brazil handuye 241 080, hamaze gupfa 16 122.

Ku mugabane wa Afurika wose hamaze kugaragara abantu 86 702 banduye Coronavirus, abamaze gupfa basaga 2785 naho abakize ni 26 33 527.

Afurika y’Epfo iri imbere mu kugira abafite ubwandu bwinshi kuko ari 15 515, abamaze gupfa ni 264, ikurikirwa na Misiri ubu ifite abamaze gupfa benshi kuri uyu mugabane, kuko bageze kuri 630 naho abamaze kwandura ni 12 229.

Muri Afurika y’Iburasirazuba, kugeza ubu igihugu kiza imbere mu bwandu bwinshi ni Kenya kuko hamaze kwandura 887 hapfuye 50, Tanzania iza ku mwanya wa kabiri, kuko handuye 509 hapfuye 21, u Rwanda rufite abanduye 292 abamaze gukira ni 197, muri Uganda ho hamaze kwandura 227, mu Burundi handuye abantu 42 hapfa umwe naho muri Sudani y’Epfo hamaze kwandura abantu 290 hamaze gupfa bane.

Abanyamerika barenga ibihumbi 90 bamaze kwicwa na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .