#Coronavirus: Abakozi basaga 4000 ba Brussels Airlines bahagaritswe mu kazi by’agateganyo

Yanditswe na IGIHE
Kuya 19 Werurwe 2020 saa 05:49
Yasuwe :
0 0

Sosiyete itwara abantu n’ibintu mu ndege, Brussels Airlines, igiye guhagarika ingendo zayo zose kubera Coronavirus bizatuma abakozi bayo barenga 4000 bava ku kazi mu gihe gito.

Brussels Airlines izahagarika ingendo zayo kuva ku wa Gatandatu, tariki ya 21 kugeza ku wa 19 Mata 2020, nk’uburyo bwo kwirinda ikwirakwira rya Coronavirus yibasiye Isi.

Mu itangazo yashyize hanze ku wa Kabiri yagize iti “Bitewe n’ibihe bidasanzwe Isi irimo kubera ikibazo cya Coronavirus, Brussels Airlines yahisemo guhagarika ingendo zayo by’igihe gito.’’

Brussels Airlines izahagarika ingendo mu gihe cy’ukwezi; yashyizeho uburyo buzafasha abakiliya bayo guhindura igihe bagombaga kuzigirira.

Mu itangazo ryayo igaragaza ko idateganya guhita ihagarika ingendo zose ahubwo yahisemo kugenda ihagarika serivisi zimwe na zimwe itanga. Izagumana gusa indege zishobora kwitabazwa aho bikenewe nko mu gusubiza abaturage b’ibihugu bitandukanye iwabo.

Mbere y’uko itangazo ry’ihagarikwa ry’ingendo z’indege za Brussels Airlines rishyirwa hanze, abakozi bayo 30% bahise babura imirimo.

Iyi sosiyete ifite abakozi barenga 4000 ku rutonde rw’abahabwa umushahara, ariko yanatanze akazi ku basaga 40,000 mu bihugu 60 bitandukanye.

Brussels Airlines iranateganya kugabanya ingendo ikora ho 35% muri Werurwe na 45% muri Mata 2020.

Nubwo Brussels Airlines yahagaritse by’agateganyo ingendo zigana New York kuva ku wa 14 Werurwe, iracyerekeza muri Leta ya Washington.

Icyemezo cya Brussels Airlines cyafashwe nyuma yuko Perezida wa Amerika, Donald Trump, yahagaritse ingendo zose ziva i Burayi mu kwirinda ubwandu bushya bwa Coronavirus.

Agahenge mu ngendo zigana muri Israël gashobora kongera kugaruka ku wa 28 Werurwe no ku wa 3 Mata 2020 ku zigana mu Butaliyani.

Mu bihe bisanzwe Brussels Airlines ikora ingendo 250 zigana mu byerekezo 120 birimo i Burayi, u Burasirazuba bwo Hagati, Afurika na Amerika ya Ruguru aho ikoresha indege 48 mu gihe itwara abagenzi basaga miliyoni 10 ku mwaka.

Hari ibigo byinshi byahagaritse ingendo zimwe na zimwe zayo zirimo icya Israel Airlines cyahagaritse ingendo zose zo hanze y’igihugu mu gihe Kenya Airways, Ethiopian Airlines, Wizz Air, American Airways, British Airways, Austalia Airlines n’ibindi bikomeye ku Isi byaharitse ingendo zirimo izerekeza mu Bushinwa n’ahandi icyorezo cya Coronavirus cyagaragaye. Byiyongeraho na RwandAir yahagaritse ingendo zose ziva n’izinjira mu gihugu.

Ishyirahamwe Mpuzamahanga rishinzwe gutwara abantu n’ibintu mu Kirere, IATA, riheruka gutangaza ko ibigo mpuzamahanga bitwara abagenzi mu ndege bizahomba miliyari $113 mu gihe Coronavirus yakomeza gukwirakwira.

OMS yemeje ku wa 11 Werurwe 2020 ko Coronavirus ari icyorezo cyugarije Isi bitewe n’uburyo umubare w’abandura iyo ndwara wiyongera ubutitsa. Imaze guhitana abantu 9,149, mu gihe abayanduye magingo aya bagera ku 223,082, muri bo 85,797 barayikize.

Sosiyete itwara abantu n'ibintu mu ndege, Brussels Airlines, itwara nibura abagenzi miliyoni 10 ku mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza