Alpha Condé agiye kwiyamamariza manda ya gatatu, miliyoni 6 banduye COVID-19 muri USA...amakuru yo hanze y’u Rwanda

Yanditswe na Iradukunda Serge
Kuya 1 Nzeri 2020 saa 10:43
Yasuwe :
0 0

Perezida wa Guinea, Alpha Condé agiye kwiyamamariza kuyobora iki gihugu muri manda ya gatatu, nyuma y’uko yemeye ubusabe bw’ishyaka rye bw’uko ryakongera kumutangaho umukandida.

Perezida Condé yemeye ubusabe bw’ishyaka rye nyuma y’uko mu ntangiriro za Kanama ryari ryavuze ko rimutanzemo umukandida mu matora y’umukuru w’igihugu ateganyijwe mu Ukwakira, gusa icyo gihe yirinda kugira icyo abitangazaho.

Uyu mugabo w’imyaka 82 yatorewe bwa mbere kuyobora Guinea mu 2010, muri Werurwe haza guhindurwa itegeko nshinga binyuze muri kamarampaka, ibintu abaturage bijujutiye bavuga ko ari ukugira ngo abone uko yiyamamariza manda ya gatatu.

Perezida wa Guinea, Alpha Condé agiye kwiyamamariza manda ya gatatu

===================================================

Andi makuru.....

Ishusho y’icyorezo cya Covid-19 ku Isi hose

Umubare w’abandura Coronavirus ku Isi ukomeje kwiyongera, aho ubu barenga miliyoni 25, mu gihe umubare w’abamaze guhitanwa nayo urenga ibihumbi 848.

Kugeza ubu muri Leta Zunze Ubumwe za Amerika nka kimwe mu bihugu byugarijwe na Covid-19, abamaze kwandura iki cyorezo bose hamwe barenze miliyoni esheshatu mu gihe umubare w’abo kimaze guhitana nawo urenga ibihumbi 183.

Kugeza ubu ubwandu bushya buri kugaragara cyane muri Leta ya Iowa, North Dakota, South Dakota na Hawaii.

Ubu bwandu bwageze kandi no muri Kaminuza zo muri iki gihugu nk’aho muri University of Alabama, abanyeshuri bamaze kwandura guhera ku wa 18 Kanama barenga 1000.

Muri University of Missouri ho abamaze kwandura barenga 300, mu gihe muri University of North Carolina bo bamaze kohereza mu rugo abanyeshuri 130 bagaragayeho iki cyorezo.

Nubwo umubare w’abandura muri iki gihugu ugenda wiyongera, umubare w’abahitanwa n’iki cyorezo buri munsi wo waragabanutse.

Mu bindi bihugu byugarijwe na Covid-19 harimo Brazil, u Buhinde, u Burusiya, Peru na Afurika y’Epfo.

Kugeza ubu iki cyorezo cyatangiye gusa nicyubura umutwe ku mugabane w’u Burayi, aho mu bihugu nk’u Bufaransa, u Bugereki, u Butaliyani, u Budage n’u Butaliyani, hatangiye kugenda hagaragara amatsinda mashya y’abantu bafite iki cyorezo.

Kuri uyu mugabane igihugu cyugarijwe cyane ni Espagne, aho abasesenguzi bavuga ko abantu bari kwandura mu buryo bwihuse kurusha muri Leta Zunze Ubumwe za Amerika.

Abamaze kwandura Covid-19 ku Isi barenze miliyoni 25

===================================================

Kenya: Umunyamakuru Rubadiri yatsindiye igihembo gikomeye gitangwa na BBC

Umunyamakuru wa Citizen Tv yo muri Kenya, Victoria Rubadiri, yatsindiye igihembo gitangwa na BBC kizwi nka BBC World News Komla Dumor award.

Rubadiri ni umwe mu banyamakuru bavuga amakuru kuri televiziyo bakunzwe n’abatari bake muri Kenya, wamenyekanye cyane binyuze mu biganiro bitandukanye akora.

Rubadiri ni Umunyakenya wa kabiri utsindiye iki gihembo, akaba n’uwa gatandatu ugitsindiye muri rusange nyuma ya Solomon Serwanjja, Waihiga Mwaura, Amina Yuguda, Didi Akinyelure na Nancy Kacungira.

Gutsindira iki gihembo byahaye Rubadiri amahirwe yo kumara amezi atatu akorana na BBC, harimo igihe azamara ahabwa amahugurwa n’ikindi azamara akora ku bitangazamakuru bitandukanye bya BBC.

Ibi bihembo byashyizweho na BBC mu rwego rwo guha icyubahiro uwahoze ari umunyamakuru wayo, Komla Dumor, witabye Imana mu 2014.

Umunyamakuru Victoria Rubadiri wo muri Kenya yegukanye BBC World News Komla Dumor award

===================================================

USA: Perezida Trump yumvikanye arengera abamushyigikiye bijanditse mu bwicanyi

Perezida wa Leta Zunze Ubumwe z’Amerika Donald Trump yumvikanye asa n’urengera bamwe mu bamushyigikiye bijanditse mu bikorwa by’urugomo birimo n’ubwicanyi, avuga ko birwanagaho.

Ku wa 30 Kanama nibwo i Portland muri Oregon, habereye imyigaragambyo yo kwamagana ibikorwa by’ihohotera aba polisi bakorera abirabura muri Leta Zunze Ubumwe za Amerika. Muri iyo myigaragambyo, abashyigikiye Trump baje gushyamirana n’abari muri iyi myigarambyo, umwe arapfa.

Mu kiganiro Perezida Trump yagiranye n’abanyamakuru ku wa 31 Kanama, yabajijwe ku bijyanye n’uru rugomo rw’abamushyigikiye.

Mu gusubiza Trump yagize ati "Birumvikana, ndabyumva ko bari bagizwe n’umubare munini w’abantu banshyigikiye, ariko yari imyigaragambyo ikozwe mu mahoro, amasasu ya pulasitiki (plastique) nk’uburyo bwo kwirwanaho, ni pulasitiki si amasasu.”

Yabajijwe n’umunyamakuru ku musore wagaragaye mu bikorwa byo kwiyamamaza kwe nyuma akaza kurasa abantu babiri mu gace ka Kenosha, bari mu myigaragambyo yo kwamagana umupolisi wari uherutse kurasa umuntu muri aka gace.

Perezida Trump yavuze ko uyu musore witwa Kyle Rittenhouse yabikoze yirwanaho.

Yagize ati "Byari ibihe bitangaje, mwabonye amashusho nk’ayo nabonye, yari arimo agerageza kubahunga, ubundi aragwa batangira kumusagarira… yari ari mu bibazo bikomeye, byashoboka ko yari kwicwa”

Perezida Trump yumvikanye mu mvugo isa n'irengera abamushyigikiye baherutse kwijandika mu bikorwa by'urugomo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .